Tuesday, October 16, 2012

ဆု


(၁)
စိတ်မဆိုးနဲ့နော်၊ ခွင့်လွှတ်ပါကွာ..ကိုယ်ရိုင်းနေရင်

(၂)
ပလေးဘွိုင်း သန်းနိုင် သီဆိုတဲ့ “ဆု” ဆိုတဲ့ သီချင်းစာသားကို အစအဆုံး ရေးဖို့ ကျနော် မရည်ရွယ်ပါဘူး။ ခုတလော ရေပန်းစားနေတဲ့ Miss International ပြိုင်ပွဲအကြောင်းကို စိတ်ဝင်စား မိလို့ပါ။ တော်သေးတာပေါ့။ Miss International ပွဲက တလပဲ လုပ်လို့။ နို့မို့ဆို မြန်မာတွေ အိပ်ရေးတွေပျက်၊ မျက်ကွင်းတွေ ချောင်ကျ၊ ကျန်းမာရေးတွေ ချို့ယွင်း၊ အလုပ်တွေ မပြီးနဲ့ တော်တော် ပြိုင်းလောက်တယ်။ ဒီဘက်ခေတ်မှာ ဒီလိုပြိုင်ပွဲဝင်နိုင်တာ ဒါ ပထမဆုံး အကြိမ်မို့လို့ ဒီလောက် အရူးအမူး ဖြစ်ကြတာများလား? ဆိုင်တဲ့ပုံတွေမှာရော မဆိုင်တဲ့ ပုံတွေမှာပါ “Myanmar” ဆိုပြီး သွားသွားအော်မိကြတာများလား?

ဒါပေမဲ့ ဒီလို မဲခွဲဆုံးဖြတ်လေ့ရှိတဲ့ နိုင်ငံတကာ ပြိုင်ပွဲတချို့မှာ ဒါမျိုးက မကြာခဏ ဖြစ်ဖူးတယ်။ အဲလိုနည်းတွေနဲ့ မြန်မာနိုင်ခဲ့တာလည်း ရှိတယ်။ နိုင်ငံတကာ blog ပြိုင်ပွဲဆိုရင်လည်း တခြား နိုင်ငံက blog တွေကိုလည်း တခုမှ မဖတ်ဖူး၊ ကိုယ် မဲပေးမယ့် ကိုယ့်နိုင်ငံက blog ကို လည်း တခါမှ မဖတ်ဖူးပဲ မဲပေးကြတာမျိုး၊ link တွေ ပေးပြီး ဖတ်ဖူးသည်ဖြစ်စေ၊ မဖတ်ဖူးသည်ဖြစ်စေ ဒါကိုပဲ မဲပေးကြပါ ဆိုပြီး campaign ဆန်ဆန် လုပ်ကြတာမျိုးတွေ ကြုံဖူးတယ်။ ကိုယ့် မဲကိုယ် တန်ဖိုးထားတဲ့သူ၊ ကိုယ့်ဆုံးဖြတ်ပိုင်ခွင့်ကို ကိုယ်တန်ဖိုးထားတဲ့သူဆို ဒါမျိုးဘယ်လုပ်ပါ့မလဲ။ ဘာမှ မကြည့်ဘဲ မျက်စေ့မှိတ်ပြီး ဘက်လိုက် မဲပေးလိုက်တယ်ဆိုတာက တကယ် ရသင့်ရထိုက်သူကို တားဆီးလိုက်တာ၊ ရသင့်ရထိုက်သူရဲ့ အခွင့်အရေးကို ခိုးယူလိုက်တာမျိုးပဲလေ။

ဒါပေမဲ့ တခြားနိုင်ငံတွေမှာလည်း အဲလိုလူတွေ ရှိတာပဲ။ ခု Miss International ပြိုင်ပွဲမှာ
ဖိလစ်ပိုင်တွေလည်း အဲလိုမျိုး pageတခု လုပ်ထားတာကို တွေ့မိတယ်။ တက်ကြွတဲ့သူ များတာနဲ့ နည်းတာရယ်၊ တက်ကြွမှု အတိုင်းအတာတွေတော့ ကွာနိုင်တယ်။ ပြိုင်ပွဲ စီစဉ်သူတွေကလည်း ဒါတွေကို သိပြီးသား နေမှာပေါ့။ လူတွေဟာ ရထိုက်သည် ဖြစ်စေ၊ မရထိုက်သည်ဖြစ်စေ အနိုင်ပဲ လိုချင်ကြတာကို နောကြေနေပြီးသား နေမှာပေါ့။ တကယ်တော့ Miss International Queen က မဲအရေအတွက်နဲ့ ဆုံးဖြတ်မှာ မဟုတ်ပါဘူး။ မဲအရေအတွက်နဲ့ ဆုံးဖြတ်ပြီး ပေးမယ့်ဆုက “Miss Internet” ဆု။ ဆု တန်ဖိုးချင်းက ကွာပါတယ်။ Internet မဲတွေကနေ တဆင့် ဆုံးဖြတ်တဲ့ ဆုမျိုး ပါမှလည်း ပြိုင်ပွဲက ပိုအသက်ဝင်မှာ၊ လူတွေ အပြိုင်အဆိုင် တက်တက်ကြွကြွ မဲပေးကြမှာတွေ သိလို့ ပြိုင်ပွဲကို promotion လုပ်မယ့် သဘောမျိုးလည်း ပါပါလိမ့်မယ်။

အခုပြိုင်ပွဲနဲ့ သိပ်မသက်ဆိုင်ပေမဲ့ ဆုတွေ အကြောင်း ပြောရရင်တော့ ဆုတွေဟာ စိတ်ဝင်စားဖို့ စိတ်လှုပ်ရှားဖို့ ကောင်းပါတယ်။ တချို့ဆုတွေ ဟာလည်း တန်ဖိုးထားထိုက်ပါတယ်။ ကိုယ်တိုင်လည်း ဆုတွေရတဲ့အခါ ပျော်တာမျိုး ရှိခဲ့ပါတယ်။ အချောင်လိုချင်ခဲ့တာ မျိုးတွေလည်း ရှိတယ်။ (သိန်းတထောင် ဆုမျိုးဆို ခုထိ ကျနော် အချောင်လိုချင်တုန်းပဲ)

တိုင်းတာရ ခက်တဲ့ အရာတွေနဲ့ ပတ်သတ်တဲ့ ဆုမျိုးကို ရွေးချယ်တဲ့ အခါမှာ အငြင်းပွါးစရာတွေ ရှိတတ်ပါတယ်။ တခါတခါ ဆုပေးသူက ဆုရသူတွေကို အသုံးချလိုက်တာလည်း ဖြစ်နိုင်ပါတယ်။ ဆိုပါစို့။ ကိုယ်က နာမည်ကြီးတဲ့သူကို ဆုပေးလိုက်ရင် ဟိုလူအတွက်က ဘာမှ အကျိုးသိပ်မရှိတဲ့ အပြင် သူကပဲ ကိုယ့်ကို ဆုပေးလို့ ကျေးဇူးတင်ရမယ့် အပေါက်မျိုး ဖြစ်သွားတတ်တာမျိုး၊ ကိုယ်ကလည်း နာမည်ကြီးသူကို ဆုချလိုက်တဲ့ အတွက် အနည်းဆုံး သတင်းထဲမှာ ပါသွားပြီး နာမည်ကြီးတာ မျိုးတွေ ရှိတတ်တယ်။ ဆိုပါစို့…ကျနော်က တက်သစ်စ ကဗျာဆရာလေးတွေအတွက်၊ ဒါမှမဟုတ်လည်း သတင်းစာဆရာလေးတွေ အတွက် (ကဗျာဆု တဆု/ သတင်းဆုတဆု) ပေးတယ်ဆိုပါစို့။ အဲလိုအခါမျိုးမှာ ဖြစ်သွားတတ်တာက….ကျနော်က သူတို့ကို အထက်စီးကနေ ဆုပေးပိုင်ခွင့်၊ ရွေးချယ် ဆုံးဖြတ်ပိုင်ခွင့် ရှိတဲ့ အနေအထားကို အလိုလို ရောက်သွားပြီး သူတို့ထက် ပိုပြီး ကြီးကျယ်ခမ်းနာသူ လိုလို ဖြစ်သွားရော။ ဆုအပေးခံတွေကလည်း ဆုပေးသူ ကျနော့်ရဲ့ ရွေးချယ်ဆုံးဖြတ်မှု၊ တန်ဖိုးဖြတ်မှုကို နာခံရမယ့် သဘော၊ ဆုရတဲ့ အတွက် ကျေးဇူးတင်ရမယ့် သဘော သက်ရောက်သွားရော။ ဒါပေမဲ့ ဆုအားလုံးကို မဆိုလိုပါဘူး။ တခါတခါ ဆရာလုပ်ချင်လို့ မဟုတ်ဘဲ၊ နာမည်ကြီးချင်လို့ မဟုတ်ဘဲ…ရိုးရိုးသားသားနဲ့ လေးလေးစားစားနဲ့ ပေးတဲ့ ဆုပေးသူတွေလည်း ရှိတတ်ပါတယ်။

တခါတခါလည်း ဆုတွေဟာ ရည်ရွယ်ချက် တခုခု ဖြစ်မြောက်ဖို့ အသုံးချခံ tool တွေ ဖြစ်နေတတ်သေးတယ်။ ဒီနှစ် ငြိမ်းချမ်းရေး နိုဗယ်ဆုကို EU က ရသွားပါတယ်။ ဦးသိန်းစိန် နိုဗယ်ဆု မရလိုက်ပေမဲ့ နာမည်စာရင်းတော့ အသွင်းခံလိုက်ရတယ်။ ဦးသိန်းစိန် အကြောင်းတော့ ကျနော် စာဖွဲ့ပြနေစရာ လိုမယ် မထင်ပါဘူး။ လွန်ခဲ့တဲ့ ငါးနှစ်လောက်ကို စိတ်ကူးထဲမှာ ပြန်မြင်ယောင်ကြည့်လိုက်ရင်ဖြစ်စေ၊ လုပ်ခဲ့တာတွေ အတွက် sorry မပြောနိုင်ဘူးလို့ ငြင်းတာကို ကြည့်ရင် ဖြစ်စေ ထင်းထင်းကြီး သိနိုင်ပါတယ်။ ဆုတကယ် မပေးပေမဲ့ နာမည်စာရင်း သွင်းလိုက်တော့ ဘာဖြစ်သွားလဲ။ Gene Sharp လို လူတွေနဲ့ ဦးသိန်းစိန်က တတန်းတစားတည်း ပမာ ဖြစ်သွားတယ်။ ဦးသိန်းစိန်လို လူတွေနဲ့ ယှဉ်ပြိုင်အရွေးခံပြီးမှ ရလာတာဟာ သိက္ခာချခံလိုက်ရတာနဲ့ အတူတူပဲလို့ ထင်နေမိတယ်။ တချိန်က စစ်အစိုးရက နိုဗယ်ဆုကို ယမ်းနံ့ညှော်နေတဲ့ လက်နဲ့ ပေးတဲ့ဆုလို့ သိက္ခာချခဲ့တာကို ပြန်အမှတ်ရမိရင်းနဲ့ ကျနော် တွေးလိုက်မိတယ်။

“ခုခေတ် ငြိမ်းချမ်းရေး နိုဗယ်ဆု ပေးပုံ၊ အမည်စာရင်း တင်သွင်းပုံတွေကိုသာ သိရင်တော့ Alfred Nobel လည်း နိုဗယ်ဆုပေးဖို့ သေတမ်းစာ ရေးခဲ့မိတာကို ဒိုင်းနမိုက် ထွင်မိတာထက်တောင် နောင်တရလောက်တယ်”

(၃)
စိတ်မဆိုးနဲ့နော်၊ ခွင့်လွှတ်ပါကွာ..ကိုယ်ရိုင်းနေရင်

ကောင်းကင်ကို

6 comments:

ဝိမွန် said...

အရှိကို အရှိအတိုင်း ချရေးထားတာပဲ။ မရိုင်းပါဘူး။ သွယ်ဝိုက်ပြီးပြောလို့ မသိတဲ့သူတွေကို
တခါတလေ တည့်တည့်ပြောပေးရတယ်။ ဒီလို ဘက်မလိုက်တဲ့ အတွေးအခေါ်စာသားတွေကို အမြဲ ထုဆစ်နိုင်ပါစေ။

Anzy said...

ကျနေ်ာ့ အမြင် ဆုတွေ မှာ သတ်မှတ်ချက် ကိုယ်စီ ၇ှိနေကြတယ် . ဥပမာ miss လိုဆုမျိုးအတွက် ပေါင်ချိန်ဘယ်လောက် အ၇ပ်ဘယ်လောက် . talent က ဘာတွေ ၇ှိ၇မယ် . စဖြင့်ပေါ့ . ဆိုတော့ အဲ့ ဒိသတ်မှတ်ချက်တွေ နဲ့ ကိုက်ညီတဲ့ သူကို miss ဆုပေးလိုက်မယ် .ဒါပေမယ့် ကျနော့်လို ပွဲကြည့်သူတယောက်က miss ဆု၇သူကို ကြိုက်ချင်မှ ကြိုက်မယ် . ကျနေ်ာ နှစ်သက်တာက ဘာဆုမှမ၇တဲ့ မိန်းခလေး သို့ မဟုတ် ၀င်မပြိုင် တဲ့ မိန်းခလေးတယောက်ဖြစ်နေမယ် . ဒါဆို သတ်မှတ်ချက် တွေ နဲ့ ရွေးချယ် ထားတဲ့ ဆုတွေ ဟာ ကျနေ်ာ့ အတွက် ဘာမှ ဟုတ်မနေတော့ ဘူး . (ဒါက အလှအပ ဆိုင်၇ာ physical ပိုင်းဆိုင်ရာဆုအတွက် အမြင်ပါ) . နန်းခင်ဇေယျာ vote တွေ ကြည့်ပြီး သောက်မြင် ကပ်လွန်းလို့ ဗျာ :D

ko said...

ဆိုးတုန်းက ဆဲတယ်..ကောင်းတော့ နိုဗယ်ဆုပေးတယ်..ဘာဖြစ်တုန်း.. အကြောင်းမသိပဲ လျှောက်ရေးနေပုံပဲ..

ကောင်းကင်ကို said...

Ko ဆိုတဲ့ သူလည်း ပို့စ်တွေ အများကြီးလိုက်ဖတ်။ အကုန်လုံးမှာ ကွန်မန့်အရှည်ကြီးတွေ လိုက်ရေးနဲ့ တော်တော်ပင်ပန်းလောက်ပြီ။ :D

Saing Khan Tun said...

ကိုကောင်းရေ ...
မှန်တယ်ထင် ရေးရဲတဲ့ ကိုကောင်း သတ္တိကို လေးစားတယ်ဗျာ

kotwo said...

မျက်စိမှိတ်ပြီး ဘက်လိုက်မဲပေးတယ်ဆိုတာ ရသင့်ရထိုက် သူရဲ့ အခွင့်အရေးကို ခိုးယူလိုက်တာ.... ဟုတ်တယ်ဗျ လူတွေက ဘယ်သူတွေက ဘယ်လိုဘက်လိုက်တာ ဘာညာနဲ့ ကိုယ်ကိုတိုင်ကျတော့ဘာမသိ ညာမသိ ကိုယ့်လူမျိုးဖြစ်ရင်ပြီးရော ဆိုပြီး ပျော်ပျော်ပါးပါးကြီး ဘက်လိုက်ကြတဲ့အပြင် သူများတွေကိုပါ ဘက်လိုက်ဖို့ တိုက်တွန်းလိုက်သေးတယ်။ ဒါကိုပဲ မျိုးချစ်စိတ်ဓါတ်လို့ ပြောကြအုံးမလား မသိဘူးနော်။