လႊတ္ေတာ္က အစိတ္သားကုိ လုိအပ္သလို

ဂ်ဴးလိယက္ဆီဇာက ဘရုတပ္ ကုိ လိုအပ္သလုိ

ဆိုကေရးတီးက အဆိပ္ခြက္ ကုိ လိုအပ္သလို
ဆင္ကေလးမိုမုိက တိရစၦာန္ရံုကုိ လိုအပ္သလုိ

မဲဆႏၵရွင္က ပါးပါးလွီးမယ့္အမတ္ကုိ လိုအပ္သလုိ
လႊတ္ေတာ္က အစိတ္သားကုိ လုိအပ္သလို
ဖရီးသင့္ကာ က သာညွိဳးကုိ လိုအပ္သလို
ဂ်ာနယ္လစ္က ပုဒ္မ (၆၆) ကုိ လိုအပ္သလုိ
လူေတြဟာ အခ်စ္ကုိ လိုအပ္တယ္။

ေကာင္းကင္ကုိ (ဧျပီ - ၂၉ - ၂၀၁၇)

Facebook မွာ ခုနေလးကတင္ အရင္တင္လုိက္တဲ့ ကဗ်ာပါ။

ဘုရားခန္းထဲေရာက္ရင္

မ်က္ေစ့ျပာေနတဲ့ေခတ္ဟာ
ေရႊဝါေရာင္ဝင္းလဲ့ေနတဲ့ျမစ္ထဲ
အမွိႈက္တခ်ိဳ႕ ပစ္ခဲ့တယ္။

 ျမန္မာႏုိင္ငံမွာ
ဝက္သားစားျခင္းအတတ္ဟာ
ကုိယ္ခံပညာတစ္ရပ္လား။

ေလာ္စပီကာထဲက ဘီလူးၾကိဳက္ ေတးသံဟာ
အာၾကမ္းလွ်ာၾကမ္းနဲ႔
လူမိုက္ဂိုက္ဖမ္းလို႔။

အမုန္းေရာဂါသည္ေတြနဲ႔
မျဖစ္မေန ဆက္ဆံေနရတဲ့အခါ
သည္းခံမွႈကို စုရံုး
ကြန္ဒံုးလို ထုတ္သံုးေနရ။

ေရွးတုန္းကလို မဟုတ္ေတာ့ဘူး။
ရတနာေသတၱာရဲ႕ အနက္အရွိႈင္းကုိ
ျမန္မာျပည္နဲ႔ မတုိင္းမိေစနဲ႔။
ငွက္ျမတ္ေတြနားတဲ့ ပရမတ္ကုိ
ျမန္မာျပည္နဲ႔ ေစ်းမျဖတ္မိေစနဲ႔။

အနိဌာရံုေတြ ခုန္ေပါက္ကစားေနက် ေခ်ာက္ထဲမွာမွ
ဇာတိရလာမိတဲ့ ငရဲႏုိင္ငံသားေတြ
ျမင္ျမင္သမွ်အလင္းစ တစ္ပြင့္ႏွစ္ပြင့္ကို
မရမက လိုက္ေကာက္ေနရ။

စိတ္ဒဏ္ရာတစ္စုကုိ
ပြင့္ဖတ္ႏုေတြနဲ႔ကပ္ဖုိ႔
အေမ့အိမ္ကို အေျပးအလႊားေလွ်ာက္
ဘုရားခန္းထဲေရာက္ရင္
ဗုဒၶရဲ႕ ဖန္မီးအိမ္မ်က္လံုးထဲမွာ
လူုေတြကုိ သေရာ္ေဝဖန္တဲ့ အျပံဳးေတြ
ရွာၾကည့္ျပီး စိတ္ေျဖရမယ္။

မ်က္ေစ့ျပာေနတဲ့ေခတ္ကေတာ့
 ေရႊဝါေရာင္ဝင္းလဲ့ေနတဲ့ျမစ္ထဲ
အမွိႈက္တခ်ိဳ႕ ပစ္လို႔။

ေကာင္းကင္ကုိ (Jan 31 – 2017)
Facebook မွာ ဇန္နဝါရီ ၃၁ တုန္းက တင္ခဲ့တဲ့ ကဗ်ာပါ

ဗံုးၾကဲေလယာဥ္

ျပည္သူ႔အခြန္ေတြ အဝစားထားတဲ့
ေသမင္းတမန္ငွက္
ေလညင္းခံထြက္တာ
ေက်ာင္းတေက်ာင္းပါသြားတယ္။
အိမ္ဆယ္အိမ္ ပါသြားတယ္။
ကေလးတခ်ဳိ႕ ပါသြားတယ္။

ဗံုးၾကဲေလယာဥ္မွာ
ေရဒါပါလာေပမဲ့ ႏွလံုးသားပါမလာဘူး။
အမိန္႔နာခံမယ့္ နား ပါလာေပမဲ့
လူေတြငိုသံျပန္ၾကားမယ့္ နား ပါမလာဘူး။

ဗံုးၾကဲေလယာဥ္ကုိ ပုတ္ျပတ္ငွား
ေဆးရံုတခုဆီသြားခ်င္တယ္။
ေျခေထာက္ဆံုးရွံဳးခဲ့သူေတြအတြက္ ေျခေထာက္ေတြၾကဲခ်
လက္ဆံုးရွံဳးခဲ့သူေတြအတြက္ လက္ေတြၾကဲခ်

ဗံုးၾကဲေလယာဥ္ကုိ ပုတ္ျပတ္ငွား
ဒုကၡသည္စခန္းတခုဆီသြားခ်င္တယ္။
အေဖအေမ ဆံုးရွံဳးခဲ့သူေတြအတြက္ အေဖအေမေတြ ၾကဲခ်
ကစားေဖာ္ဆံုးရွံဳးခဲ့သူေတြအတြက္ ကစားေဖာ္ေလးေတြၾကဲခ်

ေနာက္ဆံုးအစီအစဥ္အရ
ဗံုးၾကဲေလယာဥ္ကိုပုတ္ျပတ္ငွား
တရားလြန္စစ္စခန္းေတြဆီ သြားမယ္။
ၿပီးရင္ သူတုိ႔ဆီမွာ မ်ဳိးတံုးေလာက္ေအာင္ ရွားပါးေနဆဲ
ေနာင္တတရားေတြ ၾကဲခ်လိုက္မယ္။

ေကာင္းကင္ကုိ (January 25 - 2017)

သစ္ခက္သံလြင္ ရသစာေပ စာမ်က္ႏွာမွာ ေဖာ္ျပထားတဲ့ "ဗံုးၾကဲေလယာဥ္" ကဗ်ာပါ။ ကၽြန္ေတာ့္ blog မွာ အခုမွ ျပန္တင္ျဖစ္တာပါ။

အျပံဳးဖိုဘီးယား

မီးေတာင္တလံုးက
သံတမန္ဆန္ဆန္ ျပံဳးျပတယ္။

မ်က္ႏွာထားတင္းတင္းနဲ႔ ေသနတ္တလက္က
ၿငိမ္းခ်မ္းေရး ငွက္ကုိ ခ်စ္ေရးဆုိသလိုမ်ဳိး။

ေျပလည္ခ်င္ေဇာနဲ႔
ယံုၾကည္မွႈေတြ ပံုေအာလုိက္ဖိ႔ုဆိုတာ
လိမ္ေနက် ကန္ထရုိက္ရဲ႕
ေဆာက္မယ္ဆိုတဲ့တုိက္ကုိ
ႀကိဳပြိဳင့္နဲ႔ ဝယ္လိုက္သူထက္ မိုက္မ်ားမုိက္ေနမလား။

 ေျပးၾကည့္စရာမလိုဘူး
 ေရႊအုတ္အေကာင္းစားနဲ႔ ေရပုပ္ေျမာင္းၾကားထဲမွာ
ဝွက္ထားတဲ့ ဓားတေခ်ာင္းရွိေၾကာင္း။
ေကာင္းကင္ကုိ (ေအာက္တိုဘာ ၂၅)

ေအာက္တုိဘာလ ၂၅ ရက္ေန႔က သစ္ခက္သံလြင္ စာေပအႏုပညာ ဝက္ဘ္ဆုိဒ္ နဲ႔ ကၽြန္ေတာ့္ရဲ႕ Facebook စာမ်က္ႏွာမွာ တင္ခဲ့တဲ့ ကဗ်ာေလးပါ။

ကျွန်တော်နဲ့ ဝတ္ထုဇာတ်ကောင်တွေ

 ကျွန်တော် နဲ့ ဝတ္ထုဇာတ်ကောင်တွေ

(Facebook က ပို့စ်ကို မူရင်းဒိတ်အတိုင်း blog မှာ ပြန်စုတာပါ)

စက်မှှုတက္ကသိုလ်တက်နေတဲ့ အချိန်တုန်းက ဆရာ တက္ကသိုလ်ဘုန်းနိုင်ရဲ့ ဝတ္ထုတွေကို အသည်းစွဲ။ အခုလည်း ကြိုက်တုန်းပါပဲ။ ဆရာ တက္ကသိုလ်ဘုန်းနိုင်ကို သူငယ်ချင်းလက်ဝဲတချို့ မကြည်ကြပေမဲ့ ကျွန်တော်ကတော့ လက်ဝဲစာပေတွေကိုရော၊ တက္ကသိုလ်ဘုန်းနိုင်ရဲ့ စာတွေကိုရော ကြိုက်တယ်။ အဲဒီတုန်းက တက္ကသိုလ်ဘုန်းနိုင်ရဲ့ စာတွေကို ကြိုက်တဲ့ သူငယ်ချင်း အချင်းချင်း နောက်ကြတယ်။ ဝတ္ထုတွေဖတ်၊ စိတ်ကူးတွေယဉ်ပြီး ဘဝပျက်တော့မယ်လို့။ စကြတာပါ။ အလေးအနက် ပြောကြတာ မဟုတ်ဘူး။ 

တကယ်ကျတော့ ဘဝပျက်မယ်ဆိုရင် အဲဒီနောက်ပိုင်းကာလမှာ စွဲလမ်းလာတဲ့ ဝတ္ထုတွေကမှ ဘဝပျက်ချင်ပျက်မှာ။ (The Stranger/The Outsider/စည်းပြင်ကလူ) ထဲက မတုန်မလှှုပ် ဇာတ်ကောင် Meursault တို့၊ တခုခုကို အသေစွဲလမ်းတဲ့ Moby Dick ထဲက ကပ္ပတိန် အေးဟက်ဘ် (Ahab) တို့၊ ဂတ်စ်ဘီ (Gatsby) ထဲက ဇာတ်လိုက်တို့၊ ပြီးတော့ ဆမ်းမားဆက်မွန် ရဲ့ The Fall of Edward Barnard ၊ The Lotus Eater နဲ့ သူ့ဝတ္ထု ဘာသာပြန် “လစန္ဒာနဲ့ ခြူးပိုက်ဆံ” ထဲက လောကကို ရှောင်ခွာပြေးတဲ့ ဇာတ်ကောင်တွေ၊ အများနဲ့ မတူုတဲ့ ဇာတ်ကောင်စရိုက်တွေ၊ ဟဲမင်းဝေးရဲ့ The Killer ထဲမှာ ကိုယ့်ကို လာသတ်မှာကို ကြိုသိတာတောင် မတုန်မလှှုပ်နဲ့ ဘာမှ ကြိုတင်မပြင်ဆင်တဲ့ ဇာတ်ကောင်.. သူတို့တွေကို သဘောကျလာတယ်။ ဆရာမြသန်းတင့် ဘာသာပြန်ခဲ့တဲ့ "The Catcher in the Rye" ဝတ္ထုကို ရေးခဲ့တဲ့ စာရေးဆရာ J. D. Salinger ဟာ နောက်ပိုင်းမှာ လူ့လောက ကို ရှောင်ဖယ်ပြီး သီးသန့် နေထိုင်သွားတယ် ဆိုတာကိုလည်း စိတ်ဝင်စားမိသေးတယ်။

ဆရာ တက္ကသိုလ် ဘုန်းနိုင်ရဲ့ ဇာတ်လိုက်တွေက ဇာတ်သိမ်းကောင်းတာများတယ်။ နောက်ပိုင်း စွဲလမ်းလာတဲ့ ဝတ္ထုတွေထဲက ဇာတ်ကောင်တွေက တစ်ယောက်မှ ဇာတ်သိမ်း မကောင်းဘူး။ ဒါပေမဲ့ ခုနောက်ပိုင်းမှာ အဲဒီ ဇာတ်သိမ်းမကောင်းတဲ့ ဇာတ်ကောင်တွေကပဲ ကိုယ့်ကို inspire ဖြစ်လာစေတယ်။ ဇာတ်သိမ်းကောင်းတဲ့ ဝတ္ထုတွေဟာ ကျွန်တော့်ကို အရင်လောက် မဆွဲဆောင်နိုင်တော့ဘူး။ ဇာတ်သိမ်းမကောင်းပေမဲ့ အဲဒီဇာတ်ကောင်တွေလို ကိုယ့်ပုံစံ၊ ကိုယ့်အတွေး၊ ကိုယ့်ကမ္ဘာနဲ့ပဲ နေသွားချင်တယ်။

ဥပမာ ပြောရရင် …. The Lotus Eater ထဲက ဇာတ်လိုက်လို ကိုယ့်မှာ စုဆောင်းထားတဲ့ ပိုက်ဆံတွေ အများကြီး မရှိလို့ သူ့လို လှပတဲ့ ကျွန်းလေးမှာ သွားပြီး နေလို့ မရပေမဲ့ … ကိုယ့်အိမ်မှာ ကိုယ့်သီးသန့်ကမ္ဘာလေးဖန်ဆင်းပြီး …. အဲဒီသီးသန့် ကမ္ဘာလေးထဲမှာ… Moby Dick ထဲက ဇာတ်ကောင် ကပ္ပတိန် Ahab က ဝေလငါးဖြူကို အရူးအမူး စွဲစွဲလမ်းလမ်း ဖြစ်နေသလို ကိုယ်လည်း စာပေဖြစ်ဖြစ်၊ အနုပညာဖြစ်ဖြစ်၊ တခြားဟာ တစ်ခုခုကို ဖြစ်ဖြစ် စွဲစွဲလမ်းလမ်း ပျော်မွေ့နေချင်တယ်။ အဲဒီလိုဆိုရင် လူမှှုရေးပိုင်းတွေ၊ စီးပွားရေးပိုင်းတွေ အင်အားနည်းသွားမှာမို့ ကပ္ပတိန် အေးဟက်ဘ် တို့၊ ဂျေးဂတ်စ်ဘီတို့ အဆုံးမှာ ဘဝပျက်သလို ပျက်သွားနိုင်ပေမဲ့ နေတုန်းမှာတော့ ဘဝကို ကိုယ်နှစ်သက်တာတွေချည်းနဲ့ပဲ အပြည့်အဝ နေသွားလို့ ရတယ်လေ။ လူမှှုရေးတွေကို ဘေးချိန်ပြီး ကိုယ်နှစ်သက်တဲ့အရာတွေနဲ့ပဲ ဈာန်ဝင်စားနေမယ်။ 

အခုလည်း အဲလိုဆန်ဆန် ဖြစ်နေတာပါပဲ။ ဘန်ကောက်မှာဆိုတော့ သူငယ်ချင်းတွေ သိပ်မရှိဘူးလေ။ အလုပ်ကိုလည်း အွန်လိုင်းကပဲ လုပ်ရတာ။ တစ်လနေလို့မှ သူငယ်ချင်းတစ်ယောက်နဲ့ မတွေ့ဖြစ်ဘူး။ အပြင်လည်း မထွက်ဖြစ်ဘူး။ သီးသန့်ကမ္ဘာလေးပဲ။

အဲ…. ဘဝက ဝတ္ထုမဟုတ်တော့ အဲဒီ ဝတ္ထုဇာတ်ကောင်တွေလောက်တော့ ကိုယ့်ဘဝကိုယ် ပုံဖော်လို့ မရဘူးပေါ့။ The Lotus Eater ထဲက ဇာတ်လိုက်လို ဖရီးရိုက် မနေနိုင်ဘဲ အလုပ်တွေ ဘာတွေ ကုန်းရုန်း လုပ်ရသေးတာပေါ့။

Documentary တွေထဲကလို တောထဲသွားနေတဲ့ hermit မျိုး မဖြစ်ချင်ပေမဲ့ မြို့ ငယ်ငယ်သေးသေး လေးတစ်ခုက ကိုယ့်အခန်းကျဉ်းလေးထဲမှာ hermit ဖြစ်နေချင်တယ်။  

ကောင်းကင်ကို (၂၀၁၆ ခုနှစ် - နိုဝင်ဘာ ၁၃)

ပြီးခဲ့တဲ့နှစ်က Facebook မှာ တင်ခဲ့တဲ့ ပို့စ်

မှတ်ချက်။ အင်္ဂလိပ်စာလုံးတွေက လူအထင်ကြီးအောင် တမင် ညှပ်သုံးတာမျိုး မဟုတ်ပါဘူးး။ တချို့စာလုံးတွေက အင်္ဂလိပ်လိုကို ပိုစွဲပြီး အာရုံရလို့ ခေါင်းထဲပေါ်လာသလို ရေးထားခဲ့တာ။

(( မန်ယူဆန်တဲ့ ဘဝ ))

--------------------------

ဘဝမှာ

ကံကူမယ့်နှစ်ကို စောင့်ရတာ

မန်ယူရဲ့ အဖြစ်လိုပဲ။

နလန်မထူတဲ့စစ်မှာ

အလံဖြူတွေလည်း များလှပြီ

ရန်သူတွေလည်း ဟားလှပြီ။ 

ကောင်းကင်ကို (စက်တင်ဘာ ၁၉) 

[မန်ယူ...၃]

--------------

"မယုံနိုင်အောင်ဘဲ ... နာကျင်ကြေကွဲ... ရောင်စုံအိပ်မက်တွေ။ မှှုန်ရီလွင့်ပြယ် ပျောက်ဆုံးသွားခဲ့ပြီလေ"

သရဲနီ ကွဲပြီ ဆိုတဲ့ သတင်းငါကြားတိုင်း

"ပုလဲသီ တကွဲစီ" ဆိုတဲ့ သီချင်းစာသား သတိရမိ။

ကောင်းကင်ကို (စက်တင်ဘာ ၁၉)

မန်ယူ (၁)  (ကဗျာအဟောင်းပါ)

-----------

ချဲလ်ဆီးရဲ့ အဟောင်းပန်တော်ကျ နဲ့

သရဲကြီးရဲ့ခေါင်းပြန်ဖော်ရမှာ

သိပ်တော့ မနိပ်။

မော်ရေ...

ပိတ်ဆော့မယ့် ဘတ်စ်ကားကွက်နဲ့တော့

သိပ်ဟော့တဲ့ အမှတ်အသားကို မဖျက်နဲ့နော်။

ကောင်းကင်ကို (သြဂုတ် ၁၃)

Facebook က ဟာကို backdate နဲ့ blog မှာ ပြန်တင်တာပါ။ 

ေဘာလံုး ကဗ်ာမ်ား

Facebook မွာ ၾသဂုတ္ ၁၁၊ ၁၂ နဲ႔ ၁၃ ရက္ေန႔ေတြက တင္ခဲ့တဲ့၊ ကၽြန္ေတာ့္ရဲ႕ ေဘာလံုးကဗ်ာ ေတြပါ။

(မက္ဆီ)
----------
ဘာကာရဲ႕ ရုိးတြင္းျခင္ဆီ
ဂုိးသြင္းခ်င္ျပီ တဲ့။

မန္ယူ (၁)
--------
ခ်ဲလ္ဆီးရဲ႕ အေဟာင္းပန္ေတာ္က် နဲ႔
သရဲၾကီးရဲ႕ေခါင္းျပန္ေဖာ္ရမွာ
သိပ္ေတာ့ မနိပ္။

ေမာ္ေရ...
ပိတ္ေဆာ့မယ့္ ဘတ္စ္ကားကြက္နဲ႔ေတာ့
သိပ္ေဟာ့တဲ့ အမွတ္အသားကုိ မဖ်က္နဲ႔ေနာ္။

မန္ယူ (၂)
--------
ေမာ္ရင္ဟုိကို ျမင္ရံုနဲ႔
ေပ်ာ္ခ်င္သလိုလို ရင္ခုန္ရေပါ့။

အေရာင္ရဲနီ ယူႏုိက္တက္က
ေအာင္ပြဲဆီ အတူလိုက္တက္ဖို႔
ကမၻာေက်ာ္ဖလားလိုက္ မုဆိုးၾကမ္း
စပါယ္ရွယ္ဝမ္းကုိ စာခ်ဳပ္လိုက္ျပီ။

သရဲနီကုိ
ငရဲျပည္ကို ပုိ႔ရက္တဲ့
ဗန္ဟားက်ိန္စာေအာက္က
ခံစားခ်ိန္ လြန္ေျမာက္ေတာ့မလား။

အိပ္မက္ထဲကလို အမွတ္ေတြလွ်ံ
သရဲနီဟန္ပန္ နဲ႔
တစ္ပြဲစီမွန္မွန္ ခ်ီတက္ႏုိင္ပါေစ။

မွတ္ခ်က္။ ။ ပထမ အပုိဒ္နဲ႔ ေနာက္ဆံုးအပုိဒ္က အရင္ ကဗ်ာေဟာင္းထဲကပါ။ 

(ပရီးမီးယားလိဂ္ရဲ႕ ေနာက္ဆံုးေပၚ လက္နက္ဆန္း)
--------------------------------------------
ေမွာ္ဆန္အေတြးစစ္ နဲ႔
ေတာ္လွန္ေရးသစ္ စဖုိ႔
ဂြါဒီယိုလာေရ
လာ... ဒီကုိလာ။

တီကီတာကာ နဲ႔
ညီညီညာညာ ကစားၾကစုိ႔။

Etihad ကြင္းမွာ
အညွိဳးအနာတစ္ေထာင္နဲ႔
မိုးျပာေရာင္အသင္း
ဂိုးရာေထာင္ သြင္းႏုိင္ပါေစ။

မွတ္ခ်က္။ ။ ေနာက္ဆံုးအပုိဒ္က အရင္တုန္းက ကဗ်ာေဟာင္းထဲကပါ။

(အာဆင္နယ္)
-------------
ပရီးမီးယားလိဂ္ ျဂိဳလ္အသျပာ မွာ
အေျမာက္ဆံေတြ မ်ိဳးတုံးခဲ့တာ
၂၀၀၄ ခုႏွစ္ကတည္းက။

အာဆင္ဝင္းဂါးေရ
နာက်င္ျခင္းစကားေတြ ေျပာခဲ့ရတာ
၁၂ႏွစ္ ၁၂မိုး ရွိျပီ။

ၾကယ္ေတြ ဝယ္ေပးပါေတာ့ကြယ္။
ဖလားလက္မဲ့ဘဝနဲ႔
တအားရွက္ခဲ့ရတာ မ်ားျပီမို႔
အေျမာက္တပ္သား အာဆင္နယ္ ေတြကုိ
တစ္ေခါက္ထပ္မမွားဖုိ႔ မွာခ်င္တယ္။

(မွတ္ခ်က္။ ေနာက္ဆံုးအပုိဒ္က ၂၀၁၃ ခုႏွစ္က ကၽြန္ေတာ့္ကဗ်ာ "ပရီးမီးယားလိဂ္ နန္းလုပြဲ အၾကိဳ" ထဲကေန ျပန္ယူသံုးထားတာပါ။
-------------------------------
(ၾကိဳးၾကာနီ)
----------
လီဗာပူး “ဖိုး” - ဘာကာ “ဇီးရုိး” တဲ့။
မ်က္လံုးေတြက ပို႔တဲ့သတင္း
အရွိတရားနဲ႔ေတာင္ ကင္းလြန္းသလို။

Mane ေရ
မင္းရွိေနမယ္ ဆိုရင္
ၾကိဳးၾကာနီတို႔ အတြက္က
ဂိုးကဗ်ာသီဖုိ႔ မခက္လွဘူး။

ပရီးမီးယားလိဂ္ အဆန္ခရီးတစ္ခုကုိ
ဖန္တီးမွႈေတြ နဲ႔ သြားၾကမယ္။

မွတ္ခ်က္။ အလယ္အပုိဒ္က "Mane" ရဲ႕ နာမည္ကလြဲရင္ ... ကၽြန္ေတာ္ေရးခဲ့တဲ့ ၂၀၁၃ ခုႏွစ္က ကဗ်ာထဲက ျပန္ယူထားတာပါ။
--------------------------------------------------
(Leicester City)
--------------
တကယ္ၾကီး ျမင့္တက္လာတာလား
အလည္ခရီးအျဖစ္ထြက္လာတာလား
ငါ ထီေပါက္ႏုိင္တယ္လို႔ေတာင္ ေတြးခဲ့ဖူးေပမယ့္
မင္းတို႔ ခ်န္ပီယံ ျဖစ္ႏုိင္တယ္လုိ႔ မေတြးခဲ့ဖူးတာကလည္း
ငါ့ဘဝထဲက အမွားတစ္ခုပဲ။

ေကာင္းကင္ကို (ၾသဂုတ္ ၁၂)

ႏွင္းဆီျခံ ညီႇေစာ္နံေနေၾကာင္း ေခါင္းေလာင္းသံ

ရြာေလးကေျပာတယ္

ကုလားမဝင္ရ ဆုိင္းဘုတ္နဲ႔

သူ ရွိဳးထုတ္မလို႔တဲ့။

ေမေမကေျပာတယ္

နာနာရုိက္ေပးပါ ဆရာမတဲ့

အပုိင္းဂဏန္းငယ္ေလး

ကိန္းျပည့္ျဖစ္ လူလားေျမာက္တဲ့အခါ

ၾကီးႏုိင္ငယ္ညွဥ္း ဘဝႀကိမ္ဒဏ္က

အခု ႀကိမ္ဒဏ္ထက္ပိုနာမွာမုိ႔

တင္ပါးေတြ ခံႏုိင္ရည္ျမင့္ေအာင္

ေလ့က်င့္ေပးပါတဲ့။

ဗုဒၶက မိန္႔တယ္

ဟဲ့...ေယာအတြင္းဝန္ဆုိတဲ့ဒကာ

နင့္စာကိုဖ်က္တာ ျမင္းထိန္းငတာတေယာက္တည္း

ငါ့စာဖ်က္သူေတြကုိ ဒီမွာၾကည့္

အို...ဗုဒၶေထာက္ျပတာ ျမန္မာႏုိင္ငံေျမပံုႀကီးပဲ။

“သမုိင္းသင္တာ မအေအာင္” ဆိုေပမဲ့

“ကြန္စာရွႈ”မခ်စ္တဲ့ သမုိင္းဆရာ...

ဆံသသမားအသြင္

မွိႈင္းကြက္နင္းၿပီး ဝင္လာတယ္။

သူ႔လက္ထဲက ကပ္ေၾကးတလက္နဲ႔

ညႇပ္ၿပီးသြားတဲ့အခါ

ကေလးေတြရဲ႕ ဆံပင္က လံုးဝ...တပံုစံ

တဘက္သတ္အျမင္ေတြ ေခါင္းမွာ ကုိယ္စီပန္လုိ႔။

ေကာင္းကင္ကုိ

(သစ္ခက္သံလြင္ စာေပအႏုပညာ ဝက္ဘ္ဆုိဒ္က ဇူလိုင္ ၂၉ က ေဖာ္ျပခဲ့တဲ့ ကဗ်ာကုိ blog မွာ ျပန္တင္တာပါ)

တကုိယ္ေတာ္ကဗ်ာသမား ေမြးထားတဲ့ပုိး

Be yourself ဆိုတဲ့ ဇိမ္ခံကား

ကၽြန္ေတာ္ငွားစရာ မလိုဘူး။

ကၽြန္ေတာ့္ ျပႆ       နာက

ကၽြန္ေတာ္ဟာ ကၽြန္ေတာ္ ျဖစ္လြန္းျခင္းပဲ။

အာရံုစုိက္မွႈ ဆာေနတဲ့

Narcissist ျမာေတြလို

တမင္လုပ္ယူခ်င္တာမ်ဳိးမဟုတ္။

ပင္ကုိယ္ေလာင္စာျပင္းျပင္းနဲ႔

ကုိယ့္ေျခရာကုိယ္နင္းခ်င္တာ။

ရယ္သံကြဲေျခာက္ေျခာက္ေတြ

အစြယ္နဲ႔ေပါက္မွာ မေၾကာက္ပါဘူး။

အမ်ားအယူအဆ တရုန္းရုန္းနဲ႔

ကုိယ့္အရွိတရားကုိယ္ မဖုံးလိုပါ။

အလာပသလာပ စကားေတြ

ေရႊလိုရွားလာတဲ့ ကၽြန္ေတာ့္ပါးစပ္

ၿမိဳ႕လယ္မွာ ေတာင္ပံခတ္ရင္း

ေတာသစ္တခုငတ္တယ္။

လူနံ႔သူနံ႔ကုိ

တစိမ့္စိမ့္လန္႔တတ္သူရဲ႕

တံခါးနီအုပ္ထားတဲ့ အာအေခါင္းမွာ

Disable လုပ္ထားတဲ့ လွ်ာတေခ်ာင္း ရွိတယ္။

အကို ေလျဖတ္ေနတာလားတဲ့။

ရွည္ၿပီး လိုက္သြားမိတဲ့ ခရီးမွာ

အတန္းငယ္ ေကာင္မေလး တေယာက္ရဲ႕စကား

ဇင္ရဟန္းတပါးနဲ႔

သူ...ကၽြန္ေတာ့္ကုိမွားတယ္။

ႏွႈတ္ခမ္းက အလုပ္မလုပ္ေတာ့

ေခါင္းက ညိတ္ၿပီး အလုပ္လုပ္ရတယ္။

ေခါင္းညိတ္တိုင္း ေထာက္ခံတာလုိ႔ေတာ့ မထင္နဲ႔။

ညိတ္လိုက္တဲ့ ကၽြန္ေတာ့္ေခါင္းရဲ႕

လွ်ဳိ႕ဝွက္အဓိပၸာယ္ ေထာင္ေသာင္း

ကမၻာ့ဓာတ္ခြဲခန္းေတြ ဦးေႏွာက္ေညာင္းေလာက္ရဲ႕။

အေပါင္းအသင္းနည္းျခင္းဆိုတဲ့ ေလာကဓံတရား

ကၽြန္ေတာ့္ကုိ ထုိးေနက် ဓားပဲ။

အထုိးခံရတုိင္း

ေသြးေတြထြက္မလာဘဲ

အေတြးေတြ ထြက္ထြက္လာတယ္။

မတူမတန္သလို ဘဝင္ရုိင္းအထပ္ထပ္နဲ႔

လူေငြ႕ျဖတ္ေနတာေတာ့ မဟုတ္ပါဘူး။

ပင္ကုိယ္ေရခဲမွတ္နဲ႔

ခ်ဳိၿမိန္စကား မတတ္တာပါ။

မေပါင္းခ်င္ရင္ေတာ့ေနေပါ့။

အထီးက်န္လာတဲ့အခါ

ဝတၳဳထဲက

ဇာတ္ေကာင္ေတြနဲ႔

မ်က္နွာဖံုးမပါတဲ့ စကားေတြေျပာမယ္။

Be yourself ဆိုတဲ့ ဇိမ္ခံကား

ကၽြန္ေတာ္ငွားစရာ မလိုဘူး

ကၽြန္ေတာ့္ ျပႆနာက

ကၽြန္ေတာ္ဟာ ကၽြန္ေတာ္ ျဖစ္လြန္းျခင္းပဲ။

ေကာင္းကင္ကို (၂၃ ဇူလိုင္၊ ၂၀၁၆)

သစ္ခက္သံလြင္စာေပအႏုပညာ ဝက္ဘ္ဆုိဒ္မွာ ဇူလိုင္လ (၂၄) ရက္ေန႔က ေဖာ္ျပခဲ့တဲ့ ကဗ်ာကို blog မွာ ျပန္တင္တာပါ။ 

စီးကရက္ခ်စ္သူ

တရားသေဘာအရ
သံံေယာဇဥ္ဆိုတာ
လြတ္လပ္ျခင္းကို အစိမ္းလိုက္စားမယ့္
သားရဲတိရစာၦန္ပဲ။

ဒါေပမဲ့လည္း
ေဆးလိပ္အႏၱရာယ္ကုိ သိလ်က္နဲ႔ ရွိဴက္သူလို
အရက္အႏၱရာယ္ကို သိလ်က္နဲ႔ ႀကိဳက္သူလုိ
ဓားျပအႏၱရာယ္ကုိ သိလ်က္နဲ႔
အိမ္ေထာင္ေရး ရထားေပၚ
အတၱစိတ္ဆိုတဲ့ လက္ဝတ္လက္စားကုိ
ငါယူလာမိတယ္။

ခ်စ္သူတို႔ ကမၻာမွာ
မလြတ္လပ္မွႈဟာ
အထြတ္အျမတ္ တခုပါကြယ့္။

ၾကည့္စမ္း...
ငါ့ေနာက္ေက်ာမွာ
ႏႈတ္ခမ္းနီဆုိးေနတဲ့ ဓားတလက္။

ေကာင္းကင္ကုိ
"သစ္ခက္သံလြင္" စာေပအႏုပညာ ဝက္ဘ္ဆုိဒ္မွာ ဇူလိုင္ ၁၂ ရက္ေန႔က ေဖာ္ျပခဲ့တဲ့ ကဗ်ာပါ။

တိတၳိတစ္ေကာင္ရဲ႕ အတြင္းပုိင္းစာမ်က္ႏွာ

ငါဟာ

ဘာသာတရားကုိ စြန္႔ခြာခဲ့ေပမဲ့

ဘာသာစကားကုိ ကုိးကြယ္ေနတုန္းပါလား

ငါ့ကိုဆဲတဲ့အခါ... ငါနာတုန္းေလ။

ငါဟာ

ဘုရားသခင္ကို ေဝဖန္ရဲေပမဲ့

အလုပ္ရွင္ကုိ ေဝဖန္ရဲပါ့မလား

ဖီဆန္မွႈကို ကဗ်ာထင္သူဆုိေပမဲ့... ငါဆာတုန္းေလ။

ေၾသာ္...

ဘာသာတရားကို ငါးစာမဟပ္ေပမဲ့

သာယာစကားကုိ တအားငါငတ္ေနပါလား။

လက္ခုပ္တီးမယ့္သူကုိ... ငါရွာတုန္းေလ။

ေကာင္းကင္ကုိ 

တနလၤာသားတစ္ေကာင္ရဲ႕ ဂ်စ္ကန္ကန္ေစတနာ

ဗံုးခြဲသူေတြ လက္ခ်က္နဲ႔

ခ်စ္ကမၻာ မပ်က္ေစေရး

အလႅာဟာ

အေျပးအလႊား ယၾတာေျခေနရွာတယ္။

ေသြးကြက္ေတြနဲ႔ တိုင္းတာၾကည့္လိုက္ပါ။

ကမၻာ့ ဗလီဖ်က္သူေတြ စာရင္းမွာ

ဂုိဏ္းကြဲ မြတ္စလင္ခ်င္း ဗံုးခြဲဖ်က္တာ

အစိမ္းေသေတြ အမ်ားၾကီးပဲ။

အတူတူပဲ။

ေလးအသေခ်ၤ ကမၻာတစ္သိန္းတန္ နာမည္တစ္လံုးကုိ

ဦးေႏွာက္အရစ္ျပဳန္းေတြက

မီးေမႊးစရာ ထင္းတစ္ေခ်ာင္းလုိ သံုးေနၾကတယ္။

မုဒိမ္းမွႈ ရွာေဖြေသြးထုိးေရး ဦးစီးဌာနမွာ

အရွင္ဘုရားတုိ႔ဒကာ ဘယ္ႏွစ္ေယာက္ ပါပါသလဲ။

မုန္းသူေတြ သတ္လို႔ မေသခဲ့တဲ့ ဘုရားဟာ

ခ်စ္သူေတြ သတ္လို႔ ေသရေတာ့မွာလား။

ဘုရားစင္ေတြေပၚက ဘုရား

ရင္ဘတ္ကို ဖိဖိထားရတဲ့ ပံုရိပ္ေတြ

ျမင္ေယာင္လာတယ္။

သကၤန္းဝတ္ထားေပမဲ့

သီလ ဝတ္မထားဘူးဆိုရင္ေတာ့

ခပ္ၾကမ္းၾကမ္းေဝဖန္မွႈေတြကုိပဲ

လွဴဖြယ္ဝတၳဳလို႔ မွတ္လိုက္ပါ ဘုန္းဘုန္း။

ေကာင္းကင္ကုိ (ဇြန္ ၂၉ – မေန႔က ေရးထားတာပါ။)

တိုက္ၾကက္ေတြေပါတဲ့ကမၻာ

လူေတြဟာ

ဘုရားသခင္ရဲ႕ လွည္းက်ိဳးကုိ ထမ္းေနရဆဲ။

ေခတ္ပ်က္ တက္ဘုရားကုိ

ေမးခြန္းမဲ့ လူသားေတြက

နာခံမွႈနဲ႔ ပူေဇာ္လိုက္ၾကတဲ့အခါ

အမုန္းတရားေတြဟာ ခါးပတ္နက္။

(အခြန္ကင္းလြတ္ခြင့္ကို မျငိဳျငင္ေပမဲ့)

ႏုိင္ငံေတာ္ဟာ အခြန္လြတ္ေစ်း မဟုတ္လို႔

ေဒါသေတြကုိ တရားနာသူေတြဆီ မေရာင္းပါနဲ႔။

ေျမြေပြးထက္ျပင္းေသာ အဆိပ္မ်ား

ဟုိဆရာေတာ့္ ႏွႈတ္ဖ်ားမွာ ရွိတယ္။

ႏူကလီးယားထက္ ဆိုးတဲ့ လက္နက္ပုန္း

ဟိုဗလီဆရာရဲ႕ ကန္းမ်က္လံုးမွာ ရွိတယ္။

အမ်ိဳးသမီးအဂၤါေတြကုိ မီးခံေသတၱာထဲ သိမ္းခ်င္တာလား?

ကုိယ့္ဘုရားနိဂံုး ကုိယ္

အေသခံဗံုးေတြနဲ႔ သီကုံးခ်င္တာလား?

ကမၻာဖ်က္နီတိေတြ ထြက္ထြက္လာတဲ့ေခတ္မွာ

အရိုးနံရံ အေပါက္အျပဲၾကားက ၾကည့္လိုက္။

ကမၻာေလကမၻာလြင့္ ဟာ

အမွိႈက္ပံုးထဲက ပုပ္သုိးေနတဲ့ ေမတၱာတရားကုိ

အငမ္းမရ စားလို႔။

ေကာင္းကင္ကုိ

ဆာမူရုိင္း

တင္စားမွႈမပါဘဲ ေျပာရမယ္ဆုိရင္

ပင္လယ္ကို မဟာဇနက လက္ပစ္ကူးခဲ့သလို

ကၽြန္ေတာ္လည္း ဧဝရက္ေတာင္ကုိ မ်က္ေစ့မွိတ္ျပီး ေနာက္ျပန္ တက္ေနတုန္းပဲ။

မတူတာ တစ္ခုက

ဆုေၾကးနည္းျပီး ဒဏ္ေၾကးမ်ားတဲ့ ေလာကမွာ

ေသျခင္းတရားသာ ေမခလာပဲ။

တကယ္လို႔ ဘဝဆိုတာ

tragedy ေက်ာရုိးမွာ

comedy သေဘာမ်ိဳး ညွပ္ထည့္ထားတဲ့ ရုပ္ရွင္ဆုိရင္

ငါဟာ

ဖ်က္အားျပင္းလက္နက္ေတြကို

ခဲတံခၽြန္ဓားနဲ႔ ခုခံေနရတဲ့ ဆာမူရုိင္း။

ေကာင္းကင္ကုိ (၂၆ ဇြန္၊ ၂၀၁၆)

မဟာကရုဏာရွင္ၾကီးမ်ား ခင္ဗ်ား

ေရွးေခတ္ၾကမ္းၾကမ္းက

ပေဟဠိတန္းလန္းနဲ႔ ဥာဏ္ကြန္႔ စကားေတြ

အေငြ႕ပ်ံ... တက္သြားေလသလား။

ေကာင္းကင္မွာ

ေရႊေရာင္ဝင္းဝင္းအရုပ္ေတြနဲ႔... ေသြးေရာင္ရဲရဲ အရုပ္ေတြ

ၾကည့္ရွႈသူေတြရဲ႕ ႏွလံုသားေပၚမူတည္ျပီး

အသြင္အမ်ိဳးမ်ိဳး ေဆာင္ေနၾကတယ္။

အမုန္းအိမ္သာထဲက

ေရဆြဲခ် မထားတဲ့ က်ိန္စာေတြကို

ဘုရားသခင္ေရးခဲ့တာပါလို႔

ဘယ္မသာ credit ေပးခဲ့တာလဲ။

အဓိပၸါယ္ လြဲသြားတဲ့ သင္ခန္းစာေတြနဲ႔

အဆိပ္မျပယ္ အျမဲမွား အျမင္ကန္းတာေတြ

လက္ထပ္ထိမ္းျမားၾကတဲ့အခါ

ငရဲျပည္တစ္ခု ေမြးဖြားလာတယ္။

သာသနာျပဳသူေတြရဲ႕ ေျခေထာက္မွာ ေဗြပါၾကသလို

အၾကမ္းဖက္သမားေတြရဲ႕ DNA မွာလည္း အေတာင္ပံပါၾကတယ္။

ဒီလိုနဲ႔ အဲဒီငရဲဟာ ေဒသအမ်ိဳးမ်ိဳးကို ၾကြလာခဲ့တယ္။

အဲဒီငရဲဟာ 9/11

အဲဒီငရဲဟာ မိတၳီလာ

အဲဒီငရဲဟာ ခ်ာလီဟက္(ဘ္)ဒို အၾကမ္းဖက္မွႈ

အဲဒီငရဲဟာ ေအာ္လန္ဒုိေဂးကလပ္

အာဏာရွင္သူခုိးေတြနဲ႔

ဘာသာဝင္ဆုိးေတြ

ပါလာရင္...

ဇာတာခြင္ ဆုိးေတာ့တာပဲ။

ၾကည့္စမ္း။

ျပည္သစ္တည္ေရး ဓားေတြ အလကားျဖစ္ကုန္ျပီ

အႏွီ ခ်စ္ၾကည္ေရး စကားေတြ မတရားညစ္ကုန္ျပီ

အျငိဳးနဲ႔ မီးပ်ိဳးလာတာကုိ ရပ္ပါေတာ့။

အရုိးနဲ႔ စည္းရုိးကာမွာကုိ ရပ္ပါေတာ့။

ဘုရားရွင္ နဲ႔ ဘုရားသခင္ ခမ်ာ

အုတ္ဂူမွာ တံေတြးေထြးခံေနရေတာ့

ေျပာေရးဆိုခြင့္ နဲ႔ ေျပာႏုိင္ဆုိႏိုင္စြမ္းသာ ရွိေသးရင္

ဥာဏ္အလင္းရခဲ့တာ မွားတယ္လုိ႔မ်ား ေဟာေလမလား။

ဖန္ဆင္းျပခဲ့တာ မွားတယ္လို႔မ်ား ေျပာေလမလား။

လူသတ္ ဝါသနာအိုးေတြ လက္ခ်က္နဲ႔...

အပူသတ္ သာသနာ မိုးေတြ

အဆိပ္ျဖစ္လိုျဖစ္

စနိပ္(ခ္) ျဖစ္လိုျဖစ္နဲ႔။

မဟာကရုဏာရွင္ၾကီးမ်ား ခင္ဗ်ား

ဝမ္းနည္းပါတယ္။

ခင္ဗ်ားတုိ႔ ေပးတဲ့ လက္ေဆာင္ေကာင္းေတြ

အသက္ေထာင္ေသာင္း ေျခြ ေနေလရဲ႕။

ေကာင္းကင္ကုိ (ဇြန္ ၁၃ - ၂၀၁၆)

(ေအာ္လန္ဒုိ ေဂးကလပ္ အၾကမ္းဖက္မွႈကုိ အေၾကာင္းျပဳျပီး ျခံဳငံုေရးလိုက္တာပါ)

 

လွေသာအကြက္

တမင္မေတြ႕ဟန္ေဆာင္
ဆင္ေဝွ႔ရန္ေရွာင္ခဲ့ျပီး
မေရြ႕..အလယ္ေခါင္ရပ္
ေဝ့လည္ေၾကာင္ပတ္ နဲ႔
အခက္ေတြ႕ကာမွ
အကြက္ေရႊ႕တာလွသတဲ့
ၾကံဖန္ခ်ီးက်ဴးၾကတယ္။


အဲဒီ ျပႆနာဟာ
ငံုထားသင့္တဲ့ ကဗ်ာမ်ိဳးလည္း မဟုတ္ဘူး။
ျမံဳထားသင့္တဲ့ အနာမ်ိဳးလည္း မဟုတ္ဘူး။


ဆိုပါစုိ႔
ပန္းတစ္မ်ိဳး ကုိ ပညတ္တပ္တဲ့အခါ
ဘယ္လိုေတြ မေခၚရဘူးလို႔ နာမည္ ၁၀၀ ခ်ျပမယ့္အစား
ႏွင္းဆီလို႔ပဲျဖစ္ျဖစ္
ဆူးပန္းလို႔ပဲ ျဖစ္ျဖစ္
မွန္မွန္မွားမွား
စပ္စပ္...ခါးခါး
ျပတ္ျပတ္သားသား
ဆတ္ဆတ္... နား နဲ႔ ၾကားခ်င္တယ္။


ေကာင္းကင္ကုိ

သဲသဲကြဲကြဲ

မွတ္ခ်က္။ တခ်ိဳ႕ေတြကုိပဲ ဆုိလိုတာပါ။

ကြဲကြဲတစ္ေယာက္ မိတ္ေဆြေတြ ဆီက အၾကံဥာဏ္ရခ်င္ေနတယ္။ သဲသဲကို ဘယ္သူ႔အဆိုအမိန္႔နဲ႔ တံု႔ျပန္ရမလဲလို႔။

ကြဲကြဲ။ ။ နာဂစ္ အေျခခံဥပေဒကို မၾကိဳက္လုိ႔ ငါ မဲမေပးခ်င္ဘူးကြာ။

သဲသဲ။ ။ ဘာကြ၊ “မတရားမွႈ တစ္ခုမွာ မင္းၾကားေန ေနတယ္ဆုိရင္...မင္း... ဖိႏွိပ္သူဘက္က လိုက္ဖို႔ ေရြးလိုက္တာနဲ႔ အတူတူပဲ” ။ “မင္းလက္သန္းေလးမွာ မင္ မစိုရင္.... ျမန္မာတစ္ႏုိင္ငံလံုး ေသြးရႊဲရြဲစုိလိမ့္မယ္”


ကြဲကြဲေတြးလိုက္တယ္။ “တကယ္ေတာ့ ငါ မဲမေပးခ်င္တာ ၾကားေနသမား လုပ္ခ်င္လို႔ေတာ့ မဟုတ္ဘူး။ အေျခခံဥပေဒၾကီးမ်ား အခုထက္ပိုျပီး တရားဝင္ ခုိင္မာသြားႏိုင္သလားလို႔။ အဲဒီအေပၚမွာ အေျခခံ တည္ေဆာက္ၾကမွာကုိး။” 

ကြဲကြဲ က အေျခခံ ဥပေဒၾကီးကို ပုိျပီး တရားမဝင္ေစခ်င္ဘူးေလ။ အတုေတြနဲ႔ ေက်နပ္ႏွစ္သိမ့္သြားၾကရင္ အစစ္ကုိ ဘယ္ေတာ့မွ ရလာေတာ့မွာ မဟုတ္ဘူးလို႔ အေတြးေခါင္ေနျပန္ေရာ။ ဒါေပမဲ့ အေတြးသာ ေခါင္ေနတာ၊ တျခား ဘာလုပ္ရမွာလည္း မသိျပန္ဘူး။ အဆုိးဆံုးကေတာ့ ဖိႏွိပ္သူေတြဘက္က ရပ္ေနသူလို႔ သဲသဲက စြပ္စြဲလာတာပဲ။ ဒါနဲ႔ မခံခ်င္စိတ္ေတြ ပါးျပင္ေထာင္လာတယ္။
လက္သန္း က်ည္ဆံ နဲ႔ ထြက္လွမ္းဖီဆန္ ဖုိ႔ ဆံုးျဖတ္လိုက္တယ္။ လက္သန္း က်ည္ဆံ နဲ႔ ပုခံုးေပၚက ၾကယ္ေတြကုိ ပစ္ခ်လိုက္မယ္။


ဒီိလိုနဲ႔ သဲသဲ၊ ကြဲကြဲတုိ႔ ဇာတ္လမ္းအရေတာ့ ေအာင္ပြဲရလာတယ္။ လက္ေတြ႕မွာေတာ့ တခ်ိဳ႕ေနရာေတြမွာ ျဖစ္သင့္ျဖစ္ထုိက္တာေတြ နည္းနည္း ျဖစ္လာေပမဲ့ တခ်ိဳ႕ေနရာေတြမွာေတာ့ ကုိငွက္ရဲ႕ သီခ်င္းေခါင္းစဥ္လိုပဲ။ “အရင္အတိုင္း”။


ဆရာ စုိင္းခမ္းလိတ္ရဲ႕ သီခ်င္းလိုမ်ား ျဖစ္ေနတာလား။ “ရွင္ရင္ ေရႊထီးဆိုကာ စြန္႔စားခဲ့ေပမဲ့၊ ရခါမွကြယ္ မိဖုရားက မရွိတယ္” ဆုိသလိုေပါ့။ ေတာင္ျပိဳကမ္းျပိဳ နဲ႔ ေရႊထီးေဆာင္းျပီးမွ “လြတ္လပ္မွႈ” ဆုိတဲ့ မိဖုရားနဲ႔ ေရႊလက္မတြဲရေသးဘူးေလ။


ဒီလုိနဲ႔ အေျပာင္းအလဲတခ်ိဳ႕ ရွိလာေပမဲ့၊ မမွ်တမွႈတခ်ိဳ႕လည္း ပံုပ်က္ပန္းပ်က္ ျဖစ္လာတယ္။ ေရႊတိဂံုဘုရားမွာ ျဖစ္တဲ့ မတရားမွႈ၊ Church ထဲမွာ က်ဴးေက်ာ္ျပီး ေစတီတည္မွႈ၊ ရခုိင္မွာ တုိက္ပြဲေတြျဖစ္တာ။ ကြဲကြဲ စိတ္ပ်က္လာျပီ။


 တက္ၾကြတဲ့ လူငယ္ေတြ မ်က္ႏွာဖံုးစြပ္ ဆႏၵျပဖုိ႔ စီစဥ္ၾကတာ ကြဲကြဲ ၾကားတယ္။ ကြဲကြဲလည္း ပါဖုိ႔ ဆံုးျဖတ္လုိက္ျပီး သဲသဲ ကုိပါ သြားစည္းရံုးတယ္။ သူလည္းပါမွာပဲ။ မတရားမွႈမွာ ၾကားေနေနရင္ ဖိႏွိပ္သူဘက္က လုိက္သလို ျဖစ္သြားမွာေလ။ ဒီေတာ့ ကုိယ္လည္းပါမယ္။ သူလည္း ပါလိမ့္မယ္။


သဲသဲက ခပ္ျပတ္ျပတ္ ေလသံမာမာနဲ႔ ျငင္းတယ္။ ကြဲကြဲ နည္းနည္းေတာ့ ဖုသြားတာေပါ့။ ဒါေပမဲ့ သူ႔တုန္းကလုိ ဒက္စ္မြန္တူးတူး စကားနဲ႔ေတာ့ စကားနာ ျပန္မထုိးေတာ့ပါဘူး။ စိတ္ဆႏၵထက္သန္မွႈနဲ႔ လုပ္ရမယ့္ ကိစၥေတြမွာ အတင္းအက်ပ္ကုိင္ေနလုိ႔ အပိုပဲေလ။ သူ မလိုက္ခ်င္လည္း ေနေပါ့။ ဖိႏွိပ္သူဘက္က ရပ္ေနတာလို႔ စကားနာ မထုိးေတာ့ပါဘူး။

“မဲသာေပးၾက။ ႏုိင္ျပီးလို႔မွ တစ္ခုခု မတရားတာျဖစ္ရင္ ထိပ္ဆံုးကေန ေဝဖန္မယ္” ဆိုတဲ့သူေတြထဲက တခ်ိဳ႕လည္း ၾကက္ေပ်ာက္ ငွက္ေပ်ာက္ ေပ်ာက္ကုန္ျပီ။ “ရက္ ၁၀၀” အယူအဆ ေခတ္စားလာတယ္။ ဘာလို႔ အဲလို ယူဆၾကပါလိမ့္။ တကယ္လုိ႔ ေရတုိနဲ႔ ရွင္းလုိ႔ ရမွာမဟုတ္ဘူးလို႔ ခံယူထားတဲ့ ကိစၥေတြဟာ “ရက္ ၁၀၀” နဲ႔လည္း ရွင္းလုိ႔ ရစရာ အေၾကာင္းမရွိဘူး။ တစ္ဘက္မွာ ခ်က္ျခင္း ရွင္းလုိ႔ ရမယ့္ ကိစၥေတြအတြက္က်ေတာ့လည္း "ရက္ ၁၀၀" ျပည့္သည္အထိ အခ်ိန္ဆြဲေနစရာ မလိုပါဘူး။ အဲဒိ ရက္ ၁၀၀ အတြင္းမွာ တခ်ိဳ႕ေတြခမ်ာ ဘဝပ်က္သြားႏုိင္တယ္ေလ။
 
ကြဲကြဲ ေတြးေနတုန္းမွာ သဲသဲက စကား ဆက္လာျပန္တယ္။ “မင္းတုိ႔ ယားတာက အေရးမၾကီးဘူး။ မင္းတုိ႔လို လူနည္းစုေတြ၊ ရြာျပင္ကေကာင္ေတြ ယားလုိ႔ အာဏာျပန္သိမ္းရင္ ငါတုိ႔ အမ်ားစုေတြပါ ဒုကၡေရာက္မွာ။ မင္း သခ်ၤာ မတြက္တတ္ဘူးလား။ မင္းတို႔ေကာင္ေတြ အဖ်က္သမားေတြ” ဆုိပဲ။


အရင္တုန္းက မတရားမွႈ တစ္ခုျဖစ္ရင္ အနည္းဆံုး အြန္လိုင္းမွာေတာ့ ဆဲလုိ႔ရတယ္။ ေဝဖန္လို႔ ရတယ္။ အခုက်.....  

ေၾသာ္...အခုက် .... မတရားမွႈကို ေဝဖန္ရံုေလးနဲ႔ေတာင္ ေသြးဆူတဲ့ေကာင္ေတြလုိလို၊ စစ္အုပ္စုရဲ ဒလန္ေတြလိုလိုိ၊ ကြန္ျမဴနစ္ေတြရဲ႕ လက္ေဝခံေတြလုိလို သမုတ္ခံလာရတယ္။ သဲသဲတုိ႔လို လူေတြဟာ မတရားမွႈေတြရဲ႕ ဒိုင္းလို ျဖစ္လာတယ္။ မတရားမွႈ တစ္ခုကို ကုိယ္က ေဝဖန္ တုိက္ခုိက္ရင္ သူတို႔က ဒိုင္းလုိ အရင္ကာေပးေနသလို ျဖစ္လာတယ္။ "freedom from fear" ဆိုတဲ့ စကားကုိ သဲသဲတုိ႔ လံုးဝ ေမ့လိုက္ၾကျပီလား။


အဲဒီေတာ့ အဆုိအမိန္႔ေတြကို ကုိးကားတတ္တဲ့ သဲသဲကို ... ဘယ္သူ႔အဆုိအမိန္႔နဲ႔ ကြဲကြဲ တံု႔ျပန္သင့္ပါသလဲ။


ရြာျပင္ လမ္းထဲမွာ
နာက်င္ဝမ္းနည္း ေနတဲ့... ကြဲကြဲ :D

ေကာင္းကင္ကို (ေမ ၁၂)

ဥစၥာေစာင့္ေတြရဲ႕ ပီယဝါစာ

အညွိဳးစစ္ဘုရင္ေတြ
ထိုးစစ္ဆင္ေနတာက်
မ်ိဳးခ်စ္ဘဝင္ေတြဆီက
အပ္က်သံေတာင္ မၾကားရဘူး။

အျပံဳးေလးေတြစြက္
ပခံုးေလးေတြ ဖက္ခြင့္ျပဳကာမွ
အသည္းအသန္ေတြ ငိုျပ
ဆဲသံေတြ ျပိဳက်လာတယ္။
ေကာင္းကင္ကို (ေမ ၁၀ – ၂၀၁၆)

သတ္ပံုအမွန္ ပုခံုး အစား အသံထြက္အတုိင္း ပခံုးလို႔ ေရးထားပါတယ္။ free hugs လွႈပ္ရွားမွႈ အေပၚ ဆဲဆိုၾကတာေတြနဲ႔ ပတ္သတ္ျပီး ေရးလိုက္တာပါ။ blogspot ေဒါင္းေနခဲ့တာေၾကာင့္ Facebook မွာပဲ အရင္တင္ခဲ့ပါတယ္။

အိမ္တြင္းပုန္း

အာေရာဂ်ံ ပရာမံ လာဘံ ဆုိေပမဲ့

ကံကုိယံုျပီး ကန္ေတာ္ၾကီးတစ္ပတ္ မေျပးရဲဘူး။

ကေလးသူခုိးမုိက္ ဆုိျပီး

ေဆးထုိးလိုက္တာနဲ႔

ေဘးဆိုးဆိုက္ႏုိင္တဲ့ေခတ္မို႔

အိမ္တြင္းပုန္းေနရတယ္။

အလိမၼာစာမွာရွိတယ္ ဆုိေပမဲ့

စာအုပ္ဆုိင္ေတြထဲမွာ

ငါ့ လူႏွင္ဒဏ္သင့္ လိပ္ျပာေလး... တစ္နံနက္ခင္းလံုး မနားခ်င္ေတာ့ဘူး။

ဘာသာေရးမ်က္ႏွာဖံုးတပ္ ဂမၻီရစာအုပ္ေတြ

အလကၤာသံုး နာဇီလက္သီးေတြ နဲ႔

ကြန္ဒံုးစြပ္မထားတဲ့ အဆီျပန္ စကားလံုးေတြက

အသင့္ေစာင့္ေနၾကတာမို႔

allergy ရွိတဲ့ငါ့ခမ်ာ

အိမ္တြင္းပုန္းေနရတယ္။

မူးယစ္ဆန္႔က်င္ေရးလည္း မလုပ္ခ်င္ပါဘူး။

သိပ္ရမ္းခ်င္တဲ့

အဆိပ္ပန္းဘုရင္ေတြ

ထိပ္တန္းဝင္ ဗိုလ္က်ေနတဲ့ေခတ္မွာ

အခန္႔မသင့္ရင္ ေဆးရံုေရာက္သြားႏုိင္တာမုိ႔

ကမ္းလွမ္းလက္ေတြကုိ

ကမန္းကတန္းဝွက္ျပီး

အိမ္တြင္းပုန္းေနရတယ္။

ေကာင္းကင္ကုိ (ေဖေဖာ္ဝါရီ ၂၆ - ၂၀၁၆)

က်ီးကန္းအရွင္ၾကီး ရဲ႕ ေမတၱာစာ

သေရာ္စာကုိလည္း အတည္ထင္ျပီး မဆဲနဲ႔။

ေစာ္တကာကုိလည္း အပီခင္ျပီး မတြဲနဲ႔။

သေရာ္စာကုိ အတည္ထင္ျပီး ဆဲက ဝိုင္းဟား ခံရလိမ့္မည္။

ေစာ္တကာကို အပီခင္ျပီး တြဲက ခုိင္းစား ခံရလိမ့္မည္။

စစ္တပ္နဲ႔ကာခ်ဳပ္ကုိ Facebook မွာ သိပ္မစနဲ႔။

အပစ္ရပ္စာခ်ဳပ္ကို အေတြးညြတ္ကာ စိတ္မခ်နဲ႔။

စစ္တပ္နဲ႔ ကာခ်ဳပ္ကို Facebook မွာ သိပ္စက တရားစြဲလိမ့္မည္။

အပစ္ရပ္စာခ်ဳပ္ကုိ အေတြးညြတ္ကာ စိတ္ခ်က တအားလြဲလိမ့္မည္။

ေကာင္းကင္ကုိ

1984

ခရစၥမတ္ေတြ ဘယ္ႏွစ္ခါေျပာင္းေျပာင္း
သၾကၤန္ေတြ ဘယ္ႏွစ္ခါက်က်
ျမန္မာႏုိင္ငံဟာ ၁၉၈၄ မွာ ေက်ာက္ခ်ေနဆဲ။ 

၂ နဲ႔ ၂ ေပါင္းရင္ ၄ ရတဲ့အေၾကာင္း
ကာယကံရွင္ “၄” ကေတာင္
ဘဝနဲ႔ရင္းျပီးေျပာဖုိ႔ အားမရွိေတာ့ဘူး။ 

Big Brother က ႏွိပ္စက္တာေလာက္ကို ေျပာမေနနဲ႔
အမ်ားစုမဟုတ္ရင္
ျပည္သူကပါ ျပည္သူကုိ ဆြမ္းၾကီးဝိုင္းေလာင္းေနၾကတဲ့ေခတ္။ 

အေျခခံဥပေဒရဲ႕ မ်က္ႏွာဖံုးမွာ
အာဏာရွင္စနစ္ဟာ
ဒုိရီယန္ဂေရးရဲ႕ ရုပ္ပံုလုိ
မေျပာင္းမလဲ ႏုပ်ိဳေနဆဲ။ 

ခ်စ္ၾကည္ေရးပြဲႏုိင္လို႔
ကၽြန္ေတာ္တို႔ ေလခၽြန္ေနတုန္းမွာ
ေရႊစြန္ညိဳဟာ
မိေထြးလိုလို႔ ဝဲေနတုန္း။

 ေကာင္းကင္ကို (ဒီဇင္ဘာ ၂၅)

 Ref: George Orwell ရဲ႕ 1984
The New Yorker ရဲ႕ So Are We Living in 1984? ေဆာင္းပါး
Oscar Wilde ရဲ႕ The Picture of Dorian Gray

Gender Discrimination နဲ႔ ပတ္သတ္လို႔

ကမၻာေပၚမွာ (ေယဘုယ်အားျဖင့္) အမ်ိဳးသမီးေတြ တန္းတူ အခြင့္အေရး မရေသးဘူး။ ေယဘုယ်အားျဖင့္ တစ္ဆင့္ႏွိမ္ခံေနရတယ္ ဆိုတာက အရွိတရား။ အဲဒီအတြက္ တိုက္ပြဲဝင္ၾကတာ၊ အဲဒါ ပေပ်ာက္ေရး အတြက္ “နည္းလမ္းမွန္မွန္” နဲ႔ ၾကိဳးစားၾကတာကုိ အျပည့္အဝ ေထာက္ခံပါတယ္။ ဒါေပမဲ့ အမ်ိဳးသမီးဝါဒီ အမည္ခံထားသူေတြရဲ႕ အေျပာေတြ၊ လုပ္ရပ္ေတြနဲ႔ ပတ္သတ္လာရင္ေတာ့ ေထာက္ခံတဲ့ အပုိင္းေရာ၊ မေထာက္ခံတဲ့ အပုိင္းပါ ရွိတယ္။

ကၽြန္ေတာ္ အဓိက ေျပာခ်င္တဲ့ အခ်က္ေတြက

(၁)
 ေယာက်ာ္းေတြ အကုန္လံုးကုိ သိမ္းၾကံဳး မေကာင္းေျပာတာ။ ဥပမာ “ေယာက်ာ္းမ်ားက ေဖာက္ျပားတတ္တယ္” ဆိုတာမ်ိဳး။ တကယ္ကေတာ့ ေယာက်ာ္းထဲမွာေရာ၊ မိန္းမထဲမွာပါ ေဖာက္ျပားတဲ့သူေတြ ရွိမယ္။ ထားပါေတာ့ ေယာက်ာ္းေတြက ေဖာက္ျပားတဲ့ ရာခုိင္ႏွႈန္းပုိမ်ားတယ္ပဲ ထားပါဦး။ ရာခုိင္ႏွႈန္း တကယ္မ်ားေနတယ္ ဆုိရင္ေတာင္.... ရာခုိင္ႏွႈန္းမ်ားတုိင္း အကုန္သိမ္းၾကံဳးေျပာျခင္းဟာ ခြဲျခားဆက္ဆံမွႈေတြ ျဖစ္လာေစတဲ့ အဓိက တရားခံပဲ။ ဥပမာ... ထိပ္တန္း သိပၸံပညာရွင္ ရာခုိင္ႏွႈန္းမွာ ေယာက်ာ္းမ်ားတာ၊ ထိပ္တန္း အေတြးအေခၚပညာရွင္ေတြမွာ ေယာက်ာ္းမ်ားတာကုိ ၾကည့္ျပီး မိန္းမေတြဟာ ေယာက်ာ္းေတြထက္ ညံ့တယ္လို႔ ေကာက္ခ်က္ မခ်သင့္သလုိေပါ့။

လိင္ခြဲျခား ဆက္ဆံျခင္း၊ racist ျဖစ္ျခင္း.... အဲဒါေတြမွာ ရာခုိင္ႏွႈန္းလုိ pattern ေတြကုိၾကည့္ျပီး stereotype သေဘာထားေတြ ေပၚလာၾကတာ။ လူတစ္ေယာက္ကုိ လူလို႔ပဲ ျမင္ႏုိင္ေအာင္ ၾကိဳးစားသင့္တယ္။

လူတစ္ေယာက္က ေဖာက္ျပန္ေနတာလို႔ မျမင္ဘဲ၊ လူတစ္ေယာက္က အတင္းေျပာေနတာလို႔ မျမင္ဘဲ .... ေယာက်ာ္းေတြ ေဖာက္ျပန္ေနတာ၊ မိန္းမေတြ အတင္းေျပာေနတာလုိ႔ ျမင္ျပီဆုိရင္ ခင္ဗ်ားကုိယ္တိုင္က စျပီး ခြဲျခား ဆက္ဆံတဲ့သူ ျဖစ္သြားျပီ။

 (၂)

တခ်ိဳ႕ ကိစၥေတြမွာ reality ကုိ မ်က္ကြယ္ျပဳျပီး အတင္းလုပ္ခ်င္ၾကတာ။

ဥပမာ... အကုန္လံုး အတင္းၾကီး လိုက္ညွိေၾကးဆိုရင္ ေဘာလံုးအသင္း တစ္သင္းမွာ က်ား/မ ဆိုတာေတြကို ေဖ်ာက္ျပီး ... လူ ၁၁ ေယာက္ရွိရင္ ျပီးေရာ... က်ားျဖစ္ျဖစ္ မျဖစ္ျဖစ္ တန္းတူ ကန္ၾကပါေစ... ဆို အလုပ္ျဖစ္မွာ မဟုတ္ဘူး။ ဒါမွမဟုတ္ က်ား/မ အသင္းမခြဲဘဲ တစ္သင္းမွာ မ ေျခာက္ေယာက္၊ က်ားငါးေယာက္ ရွိရမယ္ဆုိျပီး ဇြတ္အတင္း balance လုပ္ေနရင္လည္း ေကာင္းမွာ မဟုတ္ဘူး။ တကယ္လုပ္သင့္တာက အမ်ိဳးသမီး အသင္းေတြကုိလည္း လူေတြက တန္းတူ တန္ဖိုးထား အားေပးလာေအာင္၊ အမ်ိဳးသမီးအသင္းက အမ်ိဳးသမီးကစားသမားေတြ... အမ်ိဳးသားေတြနည္းတူ တန္းတူလစာမ်ိဳး ရလာေအာင္ ၾကိဳးစားရမွာ (ဒါက ဥပမာ ေပးရံု သက္သက္ပါ။ ေဘာလံုးကိစၥမွာ အဲလုိ အတင္းၾကီး လုိက္ညွိေနတဲ့သူလည္း မရွိပါဘူး)

တခ်ိဳ႕မိန္းမေတြဟာ ေယာက်ာ္းေတြထက္ ရုပ္ပုိင္းဆုိင္ရာမွာ သန္စြမ္းျပီး ေယာက်ာ္းတစ္ေယာက္ကုိ အလဲထုိးပစ္ႏုိင္တာမ်ိဳးေတြ ရွိခ်င္ရွိမယ္။ ဒါေပမဲ့ ေယဘုယ်အားျဖင့္ေတာ့ ရုပ္ပုိင္းဆုိင္ရာအရ တခ်ိဳ႕ေနရာေတြမွာ ကြာျခားမွႈ ရွိတယ္ဆိုတဲ့ အရွိတရားကုိေတာ့ လက္ခံရမွာေပါ့။ မတူဘဲ ကြဲေနတာကုိ ေနရာတကာ အကုန္တူတယ္ ဆုိျပီး သြားလုပ္လို႔ မရဘူး။

 တကယ္လုပ္သင့္တာက ... မိန္းမေတြက... ေယာက်ာ္းေတြထက္ ပုိစြမ္းတဲ့ ေနရာေတြလည္း အမ်ားၾကီး။ အဲဒီ က႑မ်ိဳးေတြကုိ၊ အဲဒီအပုိင္းမ်ိဳးေတြကုိလည္း တျခား က်ားေတြၾကီးစုိးေနတဲ့ က႑ေတြ နည္းတူ တန္ဖိုးထားေရး ၾကိဳးစားသင့္တယ္လို႔ ထင္တယ္။

 (၃)

 အခြင့္အေရး နဲ႔ အတူ တာဝန္ယူမွႈပါ ကပ္ပါလာမွာ။ သဘာဝအရ ရုပ္ပုိင္းဆိုင္ရာအရ အားနည္းတဲ့ က႑ေတြမွာ အမ်ိဳးသမီးေတြကုိ ဦးစားေပးတာ၊ lady first လုပ္တာကုိ လက္ခံေပမဲ့ .... ေနရာတကာမွာ အသာစီးလိုခ်င္ရင္က် အားနည္းေၾကာင္း ေထာက္ခံသလို ျဖစ္သြားမွာ။

 ဥပမာ... က်န္းက်န္းမာမာ သန္သန္စြမ္းစြမ္း အသက္ငယ္ငယ္ရြယ္ရြယ္ အမ်ိဳးသမီးတစ္ေယာက္ ဘတ္စ္ကားေပၚမွာ ေနရာမရဘဲ ရပ္ျပီး စီးေနရတယ္ ဆိုပါစို႔။ တကယ္ဆုိရင္ က်ားေတြဟာ အဲဒီ အမ်ိဳးသမီးကို လိင္ပိုင္းဆုိင္ရာ အရ မေစာ္ကားဖုိ႔ဘဲ လိုတယ္။ ေနရာထျပီး ဖယ္ေပးစရာ မလိုဘူး။ ႏုိ႔မုိ႔ဆုိရင္ အမ်ိဳးသမီးေတြဟာ အားနည္သူ အသြင္ ေဆာင္သြားမယ္။ (ဒါေပမဲ ့လက္ေတြ႕မွာေတာ့ လိင္ပုိင္းဆိုင္ရာ အသားယူခ်င္တဲ ့က်ားေတြ ရွိေတာ့ ေနရာ ဖယ္ေပးလိုက္ပါ ။ အဲဒါက အမ်ိဳးသမီးေတြ အားနည္းလို႔ မဟုတ္ဘူး။ မေကာင္းတဲ့ေကာင္ေတြ ရွိေနလုိ႔ အေျခအေနအရ ကူညီလိုက္တဲ့ သေဘာ)

ျပီးေတာ့ ... လူေတြကို ေအတီအမ္စက္လို သေဘာမထားပါနဲ႔။ အေခ်ာင္လိုခ်င္စိတ္မ်ိဳး မထားပါနဲ႔။ gold digger မလုပ္ပါနဲ႔။ အဲ... အဲလုိလုပ္တဲ့သူေတြကေတာ့ ရွိမွာပဲ။ အဲလုိလုပ္ေနရင္လည္း က်ားေတြက လုပ္ေနတယ္၊ မ ေတြက လုပ္ေနတယ္လို႔ တရားေသ သေဘာမထားပါနဲ႔။

(၄) ဘယ္ကိစၥမဆို ကုိယ္ေသခ်ာမသိေသးဘူးဆိုရင္.....တစ္ခုခုျဖစ္တိုင္း “မ” ေတြပဲ အျမဲမွန္တယ္၊ က်ား ေတြပဲ အျမဲမွန္တယ္ ဆိုတဲ့ ေကာက္ခ်က္ မဆြဲပါနဲ႔။ အခြင့္ၾကံဳတုန္း မတူတဲ့ လိင္ကုိ ေဆာ္လုိက္မယ္ ဆိုတဲ့ စိတ္မ်ိဳး မထားပါနဲ႔။

 (၅)
အမ်ိဳးသမီးဝါဒီ ျဖစ္တိုင္း ယဥ္လပ္ကို ေထာက္ခံစရာ မလုိဘူး။ ႏုိင္ငံေရးမွာ .... ကုိယ္က အမ်ိဳးသမီးဝါဒီ တစ္ေယာက္ျဖစ္ရံုနဲ႔ အမ်ိဳးသမီးေခါင္းေဆာင္ တစ္ေယာက္ကို ေထာက္ခံစရာ မလိုဘူး။ ဒီလိုပဲ အမ်ိဳးသမီးျဖစ္ရံုနဲ႔ မစြမ္းေဆာင္ႏုိင္ေလာက္ဘူး ဆုိျပီး မႏွိမ္သင့္ဘူး။ စြမ္းေဆာင္ျပသြားတဲ့ သူေတြ အမ်ားၾကီး။

(၆)
ဘယ္ ေယာက်ာ္းတစ္ေယာက္မွ ေယာက်ာ္းတိုင္းကုိ ကုိယ္စားမျပဳသလုိ ဘယ္မိန္းမ တစ္ေယာက္မွလည္း မိန္းမတိုင္းကုိ ကုိယ္စားမျပဳဘူး။
 ေကာင္းကင္ကုိ (၁၁ ဒီဇင္ဘာ - ၂၀၁၅)
 Facebook မွာ အရင္တင္ခဲ့တဲ့ ပုိ႔စ္ပါ။

နတ္အလို လူမလိုက္ႏုိင္

လူဆိုတာ အရက္စက္ အယုတ္မာတတ္ဆံုး သတၱဝါေတြ မဟုတ္လား။ လူေတြ လက္ေတြ႕က်င့္သံုးေနၾက တာက ၾကီးနုိင္ငယ္ညွဥ္းဝါဒပဲ။ လူေတြထက္ ဥာဏ္အားနည္းတဲ့ တိရစၦာန္ေတြအေပၚဆိုရင္ လူေတြဟာ ရက္ရက္စက္စက္ ေမြးျမဴ၊ သတ္စား၊ ခုိင္းစားၾကတယ္။ 

ဒါေပမဲ့ လူေတြရဲ႕ လုပ္ရပ္ကို ရွက္ေနတဲ့ သက္သက္လြတ္စားသူ တစ္ေယာက္ရွိတယ္။ လူေတြ အသားစားေနတာ၊ တိရိစၦာန္ေတြအေပၚ လူေတြ ေခါင္းပံုျဖတ္ ေသြးစုပ္ေနတာ၊ ရက္ရက္စက္စက္ သတ္ျဖတ္ေနတာကို မေက်မခ်မ္း ျဖစ္ေနတဲ့သူေပါ့။ မေက်မခ်မ္းျဖစ္ေပမဲ့ သူလည္း ဘာမွ တတ္ႏုိင္တဲ့ ကိစၥေတာ့ မဟုတ္ဘူး။ သူသြားေျပာလည္း ဟုိလူေတြက အေရးစုိက္မွာမွ မဟုတ္တာ။ ဒီေတာ့ ဘာမွ မေျပာဘဲ ေနမိတာေပါ့။ ေျပာလိုက္မွ ဆန္႔က်င္ဘက္ရလဒ္ေတြ ထြက္ျပီး ပိုဆုိးျပၾကမွာ၊ “ဘာျဖစ္လဲ။ သူတို႔ဘာသာ တိရစၦာန္ျဖစ္ေနလို႔ ငါတို႔စားတာ။ ဒီေလာက္သနားေနရင္ က်ားေလွာင္အိမ္ထဲ ဝင္ေနလိုက္ပါလား။ ေျမြကိုအိမ္ေပၚ ေခၚတင္ထားပါလား” အဲလို အမုန္းစကားေတြ ထပ္ၾကားရမွာပဲ အဖတ္တင္ႏုိင္သြားႏုိင္တယ္ေလ။ ေျပာလိုက္မွ ဆြေပးသလို ျဖစ္ျပီးေတာင္ ပိုဆိုးသြားႏုိင္တယ္။ ဒီေတာ့ ကိုယ္ဘာမွမတတ္ႏုိင္သလိုမုိ႔ ႏွႈတ္ဆိတ္ေနလိုက္မိျပန္ေရာ။ စိတ္ထဲမွာေတာ့ ေၾကကြဲလို႔ေပါ့။

ဒါေပမဲ့ မရဘူး။ အဲဒီမွာ နတ္ ပညာရွိ အုပ္စုဆီက အသံေတြ ထြက္လာေတာ့တာပဲ။ “မင္းကုိယ္တုိင္က သက္သက္လြတ္သမား ဆုိေပမဲ့... အသားစားသူေတြနဲ႔ အစားခံရသူေတြၾကားမွာ မင္း... ဘာမွမေျပာဘဲ ၾကားေနေနတယ္ဆုိရင္ မင္းလည္း အသားစားသူပဲ” .... “မင္းဟာ လူဆိုတဲ့ အၾကမ္းဖက္ေကာင္ေတြ လုပ္တဲ့ ကိစၥမွာ ႏွႈတ္ဆိတ္ေနတယ္။ ဒီေတာ့ မင္းလည္း အၾကမ္းဖက္သမားပဲ” .... “အနည္းဆံုး ကုလသမဂၢလိုေတာ့ စုိးရိမ္ေၾကာင္း ေၾကညာသင့္တယ္။ အနည္းဆံုး Facebook မွာ profile ေလးေတာ့ ေျပာင္းသင့္တယ္”

ဟုတ္သားပဲ။ ဒီေတာ့ သူ profile ေလး ေျပာင္းလုိက္တာေပါ့။ ႏြားေလး အသတ္ခံရေတာ့မယ့္ သနားစရာပံုေလး။ အဲဒီမွာ တခ်ိဳ႕ပညာရွိနတ္ ေတြဆီက အသံေတြ ထြက္လာျပန္ေရာ။ ဒီေကာင္ဟာ “ႏြားေတြကိုမွ ေရြးသနားတဲ့ေကာင္” ဆိုတဲ့ အသံေတြ။ တကယ္ေတာ့ အဲဒီ ပညာရွိ နတ္ေတြ ေျပာတာလည္း တစ္စိတ္တစ္ပုိင္းေတာ့ မွန္တယ္။ တခ်ိဳ႕လူေတြဟာ အဲလို ခြဲျခားခြဲျခား လုပ္ေနက် hypocrite ေကာင္ေတြေလ။ အဲဒါနဲ႔ ေနာက္တစ္ရက္က်ေတာ့ ဝက္ေလး အသတ္ခံရေတာ့မယ့္ သနားစရာပံုေလးကို ေျပာင္းတင္လိုက္တာေပါ့။ အဲဒါလည္း မလြတ္ပါဘူး။ တျခား ပညာရွိနတ္ေတြက ေျပာျပန္တယ္။ ဒီေကာင္ဟာ ဝက္ကိုမွ ေရြးသနားတဲ့ေကာင္တဲ့။ ဒါေပမဲ့ သူကေတာ့ တကယ္ေစတနာနဲ႔ ေျပာင္းတာပါ။ ဒါေပမဲ့ လူေတြထဲမွာ စံႏွႈန္းႏွစ္မ်ိဳးနဲ႔ေကာင္ေတြမ်ားေတာ့ သူုပါ သိမ္းၾကံဳးအေျပာခံရေတာ့တာေပါ့။

ေတာ္ျပီ။ ပရိုဖုိင္းပံုေျပာင္းျပီး စာနာျပရတာ စိတ္ရွႈပ္စရာ။ counterproductive ျဖစ္ေနျပီ။ စာသားေတြနဲ႔ပဲ စာနာေၾကာင္းျပေတာ့မယ္။ စာသားေတြနဲ႔ပဲ ေတာင္းပန္ေတာ့မယ္လို႔ သက္သက္လြတ္သမားေလး ေတြးလိုက္တယ္။ သူ႔ကုိယ္သူ လူသားတစ္ရပ္လံုးရဲ႕ ေျပာေရးဆိုခြင့္ရွိသူတစ္ေယာက္ အသြင္မ်ိဳးဖမ္းျပီး စတုိင္အျပည့္နဲ႔ ဒီလိုကေလး ေရးလိုက္တယ္။

“ဒီလူဆိုးေတြဟာ လူနာမည္ခံယူထားေပမဲ့ တကယ္ေတာ့ လူ မဟုတ္သူေတြပါ။ လူစိတ္ မရွိသူေတြပါ။ လူဆုိတဲ့ နာမည္ကုိ ခံျပီး လူ႔က်င့္ဝတ္ကို မလုိက္နာၾကတဲ့ သူေတြပါ။ သူတို႔နဲ႔ ကၽြန္ေတာ္တို႔ မတူပါဘူး”။ အဲလိုကေလး ေရးျပီး ေတာင္းပန္လိုက္တာေပါ့။ ဟန္ေဆာင္ေတာင္းပန္တာေတာ့ မဟုတ္ဘူး။ ႏွစ္ႏွစ္ကာကာ ေတာင္းပန္လိုက္တာ။ စည္းျခားျပလိုက္တာေပါ့။

အဲလိုေတာင္းပန္လိုက္ေတာ့ နတ္ေတြရဲ႕ တံု႔ျပန္မွႈေလးေတြေတာ့ ရပါတယ္။ တံု႔ျပန္မွႈေတြကေတာ့ “ေဘာပဲ။ မင္းလည္း သူတုိ႔လို လက္ႏွစ္ဘက္၊ ေျခႏွစ္ဘက္နဲ႔ လူစကား ေျပာေနတဲ့ေကာင္ပဲ။ သူတုိ႔လုိ ဝတ္စားဆင္ယင္ျပီး သူတို႔လို ေနထုိင္ေနတဲ့ေကာင္။ မေကာင္းတဲ့ ေကာင္ေတြကို ကုိယ့္အုပ္စုနဲ႔ မဆုိင္သလုိ၊ မေကာင္းတဲ့ေကာင္ေတြဟာ လူမဟုတ္သလိုလုိ ေျပာျပီး... ကုိယ့္အုပ္စုရဲ႕ ဂုဏ္သိကၡာကို အကာအကြယ္ေပးေနတာ။ လူေတြဘက္ကေန ဆင္ေျခဆင္လက္ ေပးေနတာ” တဲ့။

ကဲ ... အသားစားတဲ့ လူေတြၾကားထဲက၊ အမ်ိဳးမ်ိုဳးေျပာေနၾကတဲ့ နတ္ေတြၾကားထဲက သက္သက္လြတ္သမားေလး ဘာလုပ္ရမလဲဟင္။

ေကာင္းကင္ကုိ

Obsession

ငါဟာ ကပၸတိန္ ေအးဟက္(ဘ္)

ငါဟာ ဂတ္(စ္)ဘီ

ငါဟာ ခ်န္ထြန္းေအာင္

ငါဟာ ဘၾကီးေအာင္ရဲ႕ ဆင္စြယ္ရုပ္ေလးကုိ

စြဲလန္းေနတဲ့ေကာင္။

ေကာင္းကင္ကို (ႏုိဝင္ဘာ ၁၂) ၂၀၁၅

Ref

ဝတၳဳမ်ား

--------

Moby Dick (by Herman Melville)

The Great Gatsby (by F. Scott Fitzgerald)

နတ္ကာဖီ (ေနဝင္းျမင့္)

ဘၾကီးေအာင္ညာတယ္ (မင္းသုဝဏ္)

အမွိႈက္ထဲတြင္ ရွာေဖြျခင္း

ေမးခြန္းက ထူးဆန္းေနလည္း

ခက္မလိုလို နဲ႔ လြယ္တယ္။

ကမၻာၾကီးစြန္႔ပစ္ခ်င္တဲ့ အတြင္းပစၥည္းေတြထဲမွာ

လူမေသဖူးတဲ့ အိမ္က မုန္ညင္းေစ့ထက္ ရွားတာေတြ ဆြဲထုတ္ျပပါတဲ့။

ဒုကၡေတြက လက္ပူးလက္ၾကပ္ ခ်ေရးလိုက္တယ္။

(၁)

မ်က္ႏွာေပါင္းတင္ထားတဲ့ ျခေသၤ့ဝတ္ရုံေအာက္က

တက္ၾကြတဲ့ လူသားဝါဒီ

(၂)

လင္မယားကိစၥ အနံ႔လုိက္ခံေနတဲ့ အဖြဲ႕ထဲက

အက်င့္သီလနဲ႔ ျပည့္စံုတဲ့ ေသာႏုတၱရ

(၃)

ဘုရားသခင္ကို လည္ျပန္လွီးေနတဲ့ IS အဖြဲ႕ထဲက

ဂုတ္က်ားေလာက္ ဦးေႏွာက္ရွိျပီး ေဘဘီလံုး ေလာက္ ႏွလံုးသား ရွိတဲ့သူ။

ေကာင္းကင္ကို

ေမွာ္ရံုေတာ နဲ႔ ျခဴးပုိက္ဆံ

၁၉၉၈ ေလာက္တုန္းက ေမွာ္ရံုေတာမွာ ေမာလွျပီကုိ အရင္ဖတ္ျဖစ္ျပီး၊ ေနာက္ေျခာက္လေလာက္ေနေတာ့ လစႏၵာနဲ႔ ျခဴးပုိက္ဆံကုိ ဖတ္ျဖစ္တယ္။ ေမွာ္ရံုေတာ ကုိ အရင္ဖတ္ထားတာ ဆိုေတာ့ ျခဴးပုိက္ဆံကုိ ဖတ္ျပီး တမ်ိဳးၾကီး ျဖစ္သြားတယ္။ ေမွာ္ရံုေတာ ထဲမွာက ေဂၚဂင္က စိတ္ကူးယဥ္သူရဲေကာင္း ဆန္ဆန္ ျဖစ္ေနျပီး၊ ျခဴးပုိက္ဆံထဲမွာက် (ေဂၚဂင္ကုိ မွီးျပီး ပံုေဖာ္ထားတဲ့) စထရစ္ကလန္ က ရက္စက္တဲ့သူလို ျဖစ္ေနတာကုိး။ အဲဒီတုန္းက ေမွာ္ရုံေတာကုိပဲ ပုိၾကိဳက္တယ္။ ျခဴးပုိက္ဆံ ကုိ သိပ္သေဘာမက်ဘူး။

ဒါေပမဲ့ အခုျပန္ေတြးၾကည့္ေတာ့ ေမွာ္ရံုေတာ က ဒရမာေတြမ်ား စာေရးဆရာ ဖန္တီးယူတာေတြမ်ားျပီး စိတ္ကူးယဥ္ဆန္သလို၊ အစစ္နဲ႔ ပုိေဝးသလို ခံစားရတယ္။ (ဝတၳဳေပမဲ့) ျခဴးပိုက္ဆံက သဘာဝ ပုိက်သလို ခံစားရတယ္။

ဘာသာျပန္ေတြပဲ ဖတ္ဖူးတာပါ။

အရက္သမားမ်ား ဂုဏ္တက္ျခင္း

(၁)

ဘာသာေရး ဆိုတာ အရက္သမား၊ ေဆးသမား တစ္ေယာက္ကုိေတာင္ ဂုဏ္တက္သြားေစႏုိင္တယ္။

(၂)

ဘယ္လုိ ဂုဏ္တက္ေစႏိုင္သလဲ?

ဘာသာေရး အစြန္းေရာက္ျပီး ဘာသာေရးနာမည္နဲ႔ ဗံုးခြဲေနၾက၊ လူသတ္ေနၾကေတာ့.... 

အရက္သမား တစ္ေယာက္ကို ေတြ႕တဲ့အခါ 

“ဟ... ဒီေကာင္ကေတာ့ အရက္လည္း ေသာက္တယ္ကြ။ ေဆးေျခာက္လည္း ရွဴတယ္။ ဒါဆို ဒီေကာင္ ဘာသာေရး အယူမသည္းတဲ့ေကာင္ပဲ။ ငါတုိ႔ ေၾကာက္စရာ မလိုေတာ့ဘူး” ဆိုျပီးေတာ့။

(၃)

ဟုတ္ေတာ့လည္း ဟုတ္တယ္။ ေနရာတကာ ဘုရားအေၾကာင္း ေျပာတတ္တဲ့သူေတြ ေတြ႕ရင္ ခင္ဗ်ားလည္း ဘုရားသာ တေနေပေတာ့။ အဆင္မေျပဖို႔၊ ဒုကၡေရာက္ဖုိ႔က ၅၀ ရာခုိင္ႏွႈန္းေက်ာ္ ရွိတယ္။

(၄)
ေခတ္သစ္အျမင္မွာ၊ လူသားဝါဒီေတြရဲ႕ အျမင္မွာ အရက္ အလြန္အကၽြံ စြဲေနတဲ့လူကမွ တင့္တယ္ဦးမယ္။ ဘာသာေရး အလြန္အကၽြံစြဲလမ္းေနတဲ့လူက အျမင္မတင့္ေတာ့ဘူး။

ဘာသာေရး အလြန္အကၽြံ စြဲလမ္းမွႈဆိုတာ ရွက္တတ္မယ္ဆုိရင္ တကယ္ကုိ ရွက္စရာ။

ေကာင္းကင္ကို (ေအာက္တိုဘာ ၂၂) 

ေျပာင္းလဲခ်ိန္တန္ျပီ

ျမန္မာႏုိင္ငံကုိ လက္ေတြ႕ ေျပာင္းလဲေပးႏုိင္မွာ တစ္ဖြဲ႕ပဲ ရွိတယ္။ ၂၀၁၃ တုန္းက မိတၳီလာမွာ ရြက္ေဟာင္းေၾကြျပီး ရြက္သစ္ေဝမွႈေတြ ျဖစ္လာေအာင္ စြမ္းေဆာင္ေပးခဲ့ၾကတဲ့ အဖြဲ႕ေပါ့။

သူတို႔ေၾကာင့္ အေဆာက္အဦး အေဟာင္းေတြ ေနရာမွာ အေဆာက္အဦးသစ္ေတြ ေပၚလာတယ္။ အမယ္... သူတို႔ေၾကာင့္ ႏုိင္ငံျခားက အလွဴေငြေတြေတာင္ ျမန္မာႏုိင္ငံထဲ ဝင္လာလိုက္ေသးတယ္။ လူေတြလည္း ေကာင္းကင္ဘံုတို႔ ၊ နတ္ျပည္တို႔ကို ျမန္ျမန္ေရာက္ေရာ။

ကဲ... ရြာစားေရ... ျမန္မာျပည္ ေျပာင္းလဲဖုိ႔၊ ကမၻာမေက်အေၾကာင္း သီခ်င္းနဲ႔ ပုိ႔။

သက္ဆုိး

ကၽြန္ေတာ္တုိ႔ဆီမွာ

ေရရွားေပမယ့္

တံလွ်ပ္ေတြေပါတယ္။

အနာဂတ္မဲ့ ခံစားခ်က္ေတြ ခဏေပ်ာက္ဖုိ႔

ပုလင္းေတြ တစ္လံုးျပီး တစ္လံုး ေဖာက္ခဲ့ရေပါ့။

အခုပုလင္းရဲ႕ expire date ကုိ စစ္ၾကည့္လိုက္ေတာ့

ႏုိဝင္ဘာ ၈ ရက္။

လူတိုင္းေသရမယ့္ ေလာကမွာ

ကုိယ့္အတြင္းစိတ္ ငရဲကမၻာကို ေရွာင္ဖုိ႔

သိျပီးသား မဲျပာပုဆိုး ရုပ္ရွင္ကုိ

ခဏျပန္ေမ့ထားျပီး

အတင္း ရင္ခုန္ေနရတဲ့ အရသာမ်ိဳး။

ဘာမွလုပ္လို႔ မရတဲ့အတူတူ

ယူနီေဖာင္းအသစ္နဲ႔ ဘုရားသခင္ေတြဆီက ဆုေတာင္းၾကရ။

တင္ေအးရဲ႕ ေက်းဇူးေၾကာင့္

ဘန္ေကာက္ကလုိ

ကမၻာေက်ာ္ေတြရဲ႕

သရုပ္ျပသက္သက္ တင္းနစ္ပြဲမိ်ဳး မလိုေတာ့ဘူး။

တကယ္က

နာက်င္မွႈဆုိတာ

သတိျပဳတံု႔ျပန္မွႈေတြရဲ႕အစပါ။

ခုေတာ့ ထံုေဆးဆန္ဆန္ ထြက္ေပါက္ေတြေအာက္မွာ

တံု႔ျပန္လုိျခင္းေတြ အသက္ေပ်ာက္ခဲ့။

ျမန္မာႏုိင္ငံဆိုတာ

Coma ရေနတဲ့ လူနာ၊

စက္အကူအညီနဲ႔ အသက္ဆက္ေနရေၾကာင္း သိဖုိ႔

ကုိယ့္ဘာသာကုိယ္ မွန္ထ မၾကည့္ႏုိင္ရွာဘူး။

တစ္တိတိနဲ႔ ေရရွည္ ပ်က္စီးေနမယ့္အစား

ဝုန္းခနဲ ျပိဳက်သြားမွ

ေနာင္တေတြက ျပန္တည္ေဆာက္ၾကမွာမုိ႔

ျမန္မာႏုိင္ငံေရ...

မင္းကုိ အထိန္းရပ္ျပီး

အဆင္းကုိဘီးတပ္ခ်င္တယ္။

ကၽြန္ေတာ္ဟာ

နည္းျပ ျပဳတ္ေစခ်င္လို႔

ကုိယ့္အသင္း ဂုိးျပတ္ ရွံဳးေစခ်င္သူတစ္ေယာက္။

စစ္အာဏာရွင္ေတြ ျပဳတ္ဖို႔

ျပႆနာမီးေတာက္ေတြ

ျမန္မာႏုိင္ငံကို ဂုိးျပတ္သြင္းပေစ။

ေကာင္းကင္ကုိ (၁၆ ေအာက္တိုဘာ၊ ၂၀၁၅)

မွတ္ခ်က္။ ။ သြင္းပေစ = သြင္းပါေစ ကို အသံထြက္အတိုင္း ေရးထားတာပါ။